Sansar News
काठमाडौं । शक्ति बाँडफाँटको विषयमा छलफल गर्न सत्ता गठबन्धनको निर्णायक बैठक सुरु भएको छ । प्रधानमन्त्री एवम् कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच छलफल पछि गठबन्धनको निर्णायक बैठक सुरु भएको हो ।
बैठकले आगामी सरकारको नेतृत्व कसले गर्ने भन्ने टुंगो लगाउनेछ । साथै, महत्वपूर्णं निकायहरु कसले लिने भन्ने पनि टुंग्याउनेछ ।
यसअघि शनिबार साँझ पनि दलहरु निर्णायक बैठक भनि छलफलमा जुटेका थिए । तर, शनिबार साँझको बैठक निष्कर्षबिहीन बनेको थियो ।
राष्ट्रपति विद्यादेवी भण्डारीले बहुमतसहित सरकार गठनको लागि दिएको समयसीमा आज अपरान्ह ५ बजे सकिने भएको कारण दलहरु निर्णयमा पुग्ने कसरतमा छन् । यदि निर्णयमा पुग्न नसके राष्ट्रपतिले ठूलो दलको नेतालाई सरकार गठनका लागि आव्हान गर्नुपर्ने हुन्छ ।
कांग्रेसले सहमति नभए ठूलो दलको हैसियतमा प्रधानमन्त्रीको दाबी गर्नसक्छ । जसको लागि कांग्रेसभित्र छलफल पनि चलेको छ ।
यदि सहमति नभए सत्ता गठबन्धन नै भंग हुने अर्को गठबन्धनको निर्माण हुने पनि सम्भावना छ । योबीचमा दलहरुबीच बेग्ला–बेग्लै छलफल पनि चलिरहेको छ ।
बालुवाटारको निर्णायक बैठक निष्कर्षबिहीन बने दलहरुबीच अर्को समिकरणको खेल सुरु हुनेछ ।
वि.सं.२०७९ पुस १० आइतवार ११:४३ मा प्रकाशित
