Sansar News
काठमाडौं । नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठ उपप्रधानमन्त्री बन्ने भएका छन् ।
सो पार्टीको आज बिहान बसेको पदाधिकारी बैठकले श्रेष्ठलाई उपप्रधानमन्त्री बनाउने निर्णय गरेको हो ।
आइतबार एमालेसहित बिभिन्न ७ दल र स्वतन्त्र सांसदको समर्थनमा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्रीमा नियुक्त भएका थिए । प्रचण्डले प्रधानमन्त्रीको सपथ लिनु अगाडि सरकारमा सामेल हुने मन्त्रीहरुको टुंगो लगाउन बसेको सो पार्टीको बैठकले श्रेष्ठलाई उपप्रधानमन्त्री बनाउने निर्णय गरेको हो ।
पदाधिकारी बैठकपछि माओवादी केन्द्रका उपाध्यक्ष एवम् प्रवक्ता कृष्णबहादुर महराले भने, ‘चार बजे शपथ छ, हाम्रो पार्टीका तर्फबाट हाम्रो वरिष्ठ उपाध्यक्ष नारायणकाजी श्रेष्ठ सरकारमा जानुहुन्छ । उहाँ उपप्रधानमन्त्री हो नै, मन्त्रालय के हुन्छ भन्ने विषयमा ११ बजे छलफल हुन्छ ।’
प्रधामन्त्रीमा प्रचण्डलाई समर्थन गरेका दलहरुको बैठक ११ बजे संसद भवन बानेश्वरमा बस्दैछ । सोही बैठकले आ–आफ्नो दलबाट को मन्त्री बन्ने भन्ने विषयको टुंगो लगाउने छन् ।
वि.सं.२०७९ पुस ११ सोमवार १०:५१ मा प्रकाशित
