हामी सबैकाे संसारन्यूज

काठमाडौं । उपप्रधान, भौतिक पूर्वाधार तथा यातायात मन्त्री नारायणकाजी श्रेष्ठ र सडक निर्माण सम्बन्धी निकायबीच साझा संयन्त्र बनाउने सहमति भएको छ ।

काठमाडौं महानगरपालिकाका मेयर बालेन्द्र साह, ललितपुर महानगरका मेयर चिरिबाबु महर्जन, मन्त्रालयका सचिव गोपालप्रसाद सिग्देल, काठमाण्डौं उपत्यका बिकास प्राधिकरणको आयुक्त, अधिकार सम्पन्न बागमती सभ्यता एकीकृत विकास समितिका अध्यक्ष, मन्त्रालयका सहसचिव, उपत्यका स्थित सडक डिभिजन प्रमुखहरु लगायतको सहभागितामा भएको छलफलमा सडक निर्माण सम्बन्धी निकायबीच साझा संयन्त्र बनाउने निर्णय भएको हो ।

त्यसैगरी उपत्यकाको सबै निकाय अन्तर्गतको सडकको डिजिटल म्याप तैयार गर्ने यसको लागि सडक विभागले समन्वय गर्ने, सबै निकायले आफू मातहतको सडकहरूमा परेका खाल्डाखुल्डी आपसी समन्वयबाट बनाउने निर्णय गरिएको छ ।

त्यस्तै हरेक महिनाको दोश्रो र चौथो शुक्रबार दिउसो २ बजे उपरोक्त निकाय र खानेपानी विभाग, केयूकेएल, बिधुत प्राधिकरण, नेपाल टेलिकम सहितको नियमित बैठक बस्ने निर्णय भएको छ । उक्त बैठक स्थायी संरचना नबन्दासम्मका लागि बस्ने बताइएको छ ।