हामी सबैकाे संसारन्यूज

काठमाडौं । नेपाली कांग्रेसका नेता डा. शेखर कोइरालाले प्रधानमन्त्री पुष्पकमल दाहाल प्रचण्डलाई विश्वासको मत दिनु गलत भएको बताएका छन् । आइतबार बत्तीसपुतलीस्थित अनुपम फुडल्याण्डमा आफुँ निकट नेताहरुको बैठकलाई सम्बोधन गर्दै नेता कोइरालाले यस्तो बताएका हुन् ।

“प्रधानमन्त्री प्रचण्डलाई विश्वासको मत दिएर हामीले गल्ती गर्‍यौं । तटस्थ बस्ने प्रस्ताव मैले कार्यसम्पादन समितिको बैठकमा राखेको थिएँ । तर, त्यसको सुनुवाइ भएन”, उनले भनेका छन्, “बहुमतको निर्णय मान्नुपर्ने बाध्यता पर्‍यो । विश्वासको मत दिन हुँदैनथ्यो ।”

सभापति शेरबहादुर देउवाको प्रस्तावमा कांग्रेस केन्द्रीय कार्यसमिति बैठकले प्रधानमन्त्री प्रचण्डलाई विश्वासको मत दिने निर्णय गरेको थियो ।

कांग्रेसका महामन्त्रीद्वय विश्वप्रकाश शर्मा र गगन थापासहित नेताहरू प्रकाशमानसिंह, अर्जुननरसिंह केसी, बलबहादुर केसी र प्रदीप पौडेलले लिखित असहमति जनाएका थिए ।