काठमाडौं । चालु आर्थिक वर्ष २०७९/८० को दोस्रो त्रैमासमा वाणिज्य बैंकहरुको नाफामा सामान्य बृद्धि देखिएको छ । यो अवधिमा २० वाणिज्य बैंकहरुको मुनाफा ३० अर्ब नाघेको छ ।
दोस्रो त्रैमासको अवधिमा वाणिज्य बैंकहरुको मुनाफा ११.७१ प्रतिशतले बढेको छ । यो अवधिमा १५ वाणिज्य बैंकको नाफा बढेको छ भने दर्जन बढी बैंकको नाफा घटेको छ ।
नाफामा सामान्य बृद्धि देखिनु मर्जरबाट बिलय भएका बैंकहरुको मुनाफाको योगदान पनि अधिक नै मान्न सकिन्छ । बिलय भएका बैंकहरुको गत वर्षको मुनाफा जोड्ने हो भने तीन प्रतिशत हाराहारीको मात्रै सुधार देखिन्छ ।
समीक्षा अवधिमा प्रतिशतका आधारमा नाफा वृद्धिमा एभरेष्ट बैंक नाफा कमाउने सबैभन्दा आक्रामक देखिएको छ । बैंकले यो अवधिमा सबैभन्दा धेरै ८९.२९ प्रतिशत नाफा बढाएको छ । बैंकले यो अवधिमा एक अर्ब ५८ करोड नाफा आर्जन गरेको छ ।
तर, सबैभन्दा धेरै नाफा कमाउनेमा नबिल बैंक बनेको छ । बैंकले ५६.६७ प्रतिशत बढाएर तीन अर्ब ४१ करोड ७६ लाख रुपैयाँ नाफा आर्जन गरेको छ ।
दोस्रो धेरै मुनाफा आर्जन गर्नेमा एनआइसी एशिया बैंक रहेको छ । जसले यस अवधिमा ४१ प्रतिशतले मुनाफा बढाउँदै दुई अर्ब ७१ करोड आर्जन गरेको छ । बैंकले गत वर्षको यही अवधिमा एक अर्ब ९१ करोड रुपैयाँ आर्जन गरेको थियो ।
नाफा आम्दानी बढी गर्नेमा तेस्रोमा ग्लोबल आइएमई बैंक छ । यो अवधिमा ४.४६ प्रतिशत बढेर दुई अर्ब ७८ करोड २३ लाख रुपैयाँ पुगेको छ । चौंथोमा राष्ट्रिय वाणिज्य बैंकको ४१।२७ प्रतिशत बढेर दुई अर्ब ७१ करोड १८ लाख रुपैयाँ र पाँचौमा एनएमबि बैंकको ११ प्रतिशत बढेर एक अर्ब ९० करोड ११ लाख रुपैयाँ खुद नाफा आर्जन गरेका छन् ।
यस वर्ष कृषि विकास बैंकको मुनाफा भने ऋणात्मक देखिएको छ । बैंक १२ करोड ८९ लाख रुपैयाँले नोक्सानमा देखिएको हो । गत वर्ष यही अवधिसम्म बैंकले एक अर्ब ४२ करोड रुपैयाँ खुद नाफा आर्जन गरेको थियो।
कुनको नाफा कति ?
वि.सं.२०७९ माघ ८ आइतवार १२:४१ मा प्रकाशित