हामी सबैकाे संसारन्यूज

काठमाडौं । सरकार सन्चालनका लागि गठन गरिएको उच्चस्तरीय राजनीतिक संयन्त्रको बैठक आज बस्दै छ ।

आज बिहान नौ बजे प्रधानमन्त्रीको सरकारी निवास बालुवाटारमा बस्ने गरि बोलाइएको उक्त बैठकमा समसामयिक राजनीतिक विषयमा छलफल हुने बताइएको छ ।

एमालेका अध्यक्ष केपी शर्मा ओली संयोजक रहेको उक्त संयन्त्रको बैठक बिहीबार ३ बजेका लागि बोलाइए पनि त्यसलाई स्थगित गरेर प्रधानमन्त्री पुष्पकमल दाहाल ‘प्रचण्ड’ र ओलीबीच सिंहदरबारमा बैठक बसेको थियो ।

राष्ट्रिय स्वतन्त्र पार्टी सरकारबाट बाहिरिएको, नागरिक उन्मुक्ति पार्टीको समर्थन नपाएपछि एमालेको नेतृत्वमा बनेको सुदूरपश्चिम सरकार एक महिनामै ढलेको, जनमत पार्टीले मन्त्रालय लगायतका विषयमा असन्तुष्टि जनाउँदै आएको राजनीतिक परिस्थितिकाबीच संयन्त्रको बैठक बस्न लागेको हो ।

बैठकमा आगामी फागुन २५ गते हुने राष्ट्रपतिको निर्वाचनका विषयमा पनि छलफल हुने बताइएको छ । यसअघि पुष १० गतेको सहमति अनुसार राष्ट्रपति पद आफुले पाउने एमालेले दावी गर्दै आएको छ भने कांग्रेसको समेत विश्वासको मत पाएका प्रधानमन्त्री प्रचण्डले राष्ट्रपति पदमा राष्ट्रिय सहमति गरेर अगाडि बढ्ने भन्दै छलफल र संवाद बढाएका छन् ।

सरकार संचालनमा सहयोग पुर्याउनका लागि ओली नेतृत्वमा पुस १५ गते गठन गरिएको उक्त उच्च राजनीति संयन्त्रको सदस्यमा माओवादी केन्द्रका अध्यक्ष प्रचण्ड, रास्वपाका सभापति रवि लामिछाने, राप्रपाका अध्यक्ष राजेन्द्र लिङ्देन र जसपाका अध्यक्ष उपेन्द्र यादव सदस्य रहेका छन् ।