हामी सबैकाे संसारन्यूज

काठमाडौं । सुदूरपश्चिमका मुख्यमन्त्री कमल बहादुर शाहले आज प्रदेश सभाको बैठकबाट मुख्यमन्त्रीमा विश्वासको मत लिने तयारी गरेका छन् ।

आज दिउँसो १ बजे बोलाईएको प्रदेश सभाको बैठकबाट मुख्यमन्त्री शाहले विश्वासको मत लिने तयारी गरेका हुन् ।

गत २६ माघमा मुख्यमन्त्रीमा नियुक्त भएका नेपाली कांग्रेसका शाह मुख्यमन्त्री नियुक्त भएको ३० दिनमा प्रदेश सभाको बैठकबाट विश्वासको मत लिन लागेका हुन् ।

फागुन १२ गते नेपाली कांग्रेस, माओवादी केन्द्रसहित ८ दलको नयाँ सत्ता समिकरण बनेपनि नेकपा माओवादी केन्द्र सुदूरपश्चिमले शाहलाई विश्वासको मत नदिने निर्णय गरेको छ ।

नेकपा माओवादी केन्द्र सुदूरपश्चिम प्रदेश सभा संसदीय दलका नेता खगराज भट्टले शाहलाई विश्वासको मत नदिने निर्णय भएको जानकारी दिएका छन् ।

त्यसैगरी प्रदेश सभामा सात सदस्य रहेको नागरिक उन्मुक्ति पार्टीले पनि विश्वासको मत नदिने बताएको छ ।

सो पार्टीकी अध्यक्ष रन्जिता श्रेष्ठले पनि आफ्ना मुद्दाहरुमा लिखित सहमति नभएसम्म शाहलाई विश्वासको मत नदिने पार्टीको पुरानै अडान दोहोर्याएकी छन् ।

हाल सुदूरपश्चिम प्रदेश सभामा नेपाली कांग्रेसका १९, नेकपा माओवादी केन्द्रका १०, नाागरिक उन्मुक्ति पार्टीका ७, नेकपा एकिकृत समाजवादी पार्टीका ४ र एक स्वतन्त्र सांसद गरी ४० जना सांसद रहेका छन् ।

यसअघि तत्कालीन सात दलीय गठबन्धनबाट पुस २७ गते मुख्यमन्त्री नियुक्त भएका नेकपा एमालेका राजेन्द्र रावलले विश्वासको मत जुटाउन नसकेपछि पदमुक्त भएका थिए । उनी पदमुक्त भएसँगै प्रदेशसभामा सबैभन्दा ठूलो दल नेपाली कांग्रेसबाट शाह मुख्यमन्त्री बनेका हुन् ।