हामी सबैकाे संसारन्यूज

काठमाडाैं । प्रहरीले पूर्वमन्त्री तथा नेकपा एमालेका सचिव टोपबहादुर रायमाझीको घरमा छापा मारेकाे छ । भुटानी शरणार्थी प्रकरणसम्बन्धी अपराधमा तानिएपछि सातदोबाटोस्थित रायमाझीको घरमा काठमाडौं प्रहरी परिसरको टोलीले छापा मारेको हो ।

घरमा छापा मारिएपनि रायमाझी भने फेला परेनन् । उनीविरूद्ध काठमाडौं जिल्ला अदालतले वैशाख २० गते पक्राउ पुर्जी जारी गरेको थियो। तर, प्रहरीले पक्राउ पुर्जी जारी गरेपछि अर्घाखाँची हुँदै भैरहवासम्म आइपुगेका उनी त्यहाँबाट भने सम्पर्कविहीन बनेका थिए ।

उनलाई पक्राउ गर्न जिल्ला प्रहरी परिसर काठमाडौंले ७७ वटै जिल्लामा पत्राचार गरेको छ। यस्तै, उनी भारत भागेको हुनसक्ने प्रहरीको आशंका समेत छ।

साेही प्रकरणमा पक्राउ परेकाहरुले रायमाझीलगायतका उच्च तहका नेता र कर्मचारीको संलग्नता रहेको भन्दै बयान दिएका थिए । साे आधारमा रायमाझी छानबिनकाे दायरामा तानिएका हुन् ।

नक्कली शरणार्थी प्रकरणमा हालसम्म ८ जना पक्राउ परिसकेका छन् । जसमध्ये टोपबहादुरकै छोरा सन्दिप पनि एक हुन्।

आरोपितको बयानका आधारमा कांग्रेस र एमालेका उच्च नेताहरुको नाम जोडिएको छ । थप उच्च तहका नेताहरुको नाम जोडिएपछि अनुसन्धान केही सेलाएजस्तो पनि देखिएको छ ।