हामी सबैकाे संसारन्यूज

काठमाडौं । काठमाडौं महानगर पालिकाभित्र संचालित ५०४ वटा विद्यालयमध्ये ४६५ विद्यालयले १३ हजार विद्यार्थीलाई छात्रवृत्ति दिएको विवरण पठाएका छन् ।

काठमाडौँ महानगरपालिकाको विद्यालय शिक्षा व्यवस्थापन नियमावली, २०७४ को नियम ५८ र ५९ एवं काठमाडौँ महानगरपालिका शिक्षा ऐन, २०७५ को दफा ५० अनुसार प्रत्येक विद्यालयमा छात्रवृत्ति वितरण गरेको विवरण उपलब्ध गराउन महानगरले निर्देशन दिएको थियो ।

महानगरले गत जेठ १८ गतेभित्र नियमअनुसार छात्रवृत्ति प्रदान गरेको विवरण उपलब्ध नगराउनेलाई कारबाहीको चेतवानी समेत दिएको थियो । उक्त चेतावनीपछि महानगरभित्र संचालनमा रहेका ५०४ विद्यालय मध्ये ४६५ विद्यालयले १३ हजार विद्यार्थीलाई छात्रवृत्ति वितरण गरेको विवरण पठाएका थिए ।

महानगर प्रमुख बालेन शाहले हालसम्म विवरण नपठाएका बाँकी विद्यालयहरूलाई १ लाख रुपैयाँसम्म जरिवाना तिराएर थप एकपटक विवरण बुझाउने मौका दिइने बताएका छन् ।

‘त्यसपछि पनि विवरण नबुझाएमा काठमाडौँ महानगरपालिका शिक्षा ऐन, २०७५ को दफा ५७ को उपदफा ४ बमोजिम विद्यालयलाई प्रदान गरिएको अनुमति वा स्वीकृति रद्द गर्ने गरी कारबाही गरिनेछ ।’ मेयर शाहले भनेका छन् ।