हामी सबैकाे संसारन्यूज

काठमाडौं । सन्राइज बैंकले देशका विभिन्न विद्यालयहरुमा प्याड एटिएम प्रदान गरेको छ ।

देशभर विभिन्न सामाजिक उत्तरदायित्वका कामहरु गर्दै आएको बैंकले महिला स्वास्थ्य र महिलाहरुको सशक्तिकरणको लागि विद्यालयमा अध्ययनरत छात्राहरु तथा कार्यरत महिलाहरुलाई लक्षित गरी प्याड एटिएम प्रदान गरेको हो ।

हाल विद्यालयमा व्यवस्थित शौचालय र स्यानेटरी प्याडको व्यवस्था नहुँदा उनीहरु विद्यालय जान अप्ठेरो मान्ने गरेका समस्यालाई मध्येनजर गर्दै बैंकले विभिन्न विद्यालयहरुमा अटोमेटिड प्याड भेन्डिङ मशिन प्रदान गरेको हो ।

एउटा सिक्का हाल्दा एउटा एबम आउने ब्याट्री ब्याकअप सहितको उक्त मेसिनले छात्राहरु तथा विद्यालयमा कार्यरत महिलाहरुलाई आवश्यक पर्दा सजिलै प्याड लिन सकिने वातावरणको सिर्जना हुने बैंकले बताएको छ ।

बैंकले बुधबार एक कार्यक्रमका बिच काठमाडौँको शान्ति विद्यागृह माध्यमिक विद्यालय, लैनचौरमा एक थान प्याड मसिन र एक थान प्याड डिस्पोजल मेसिन हस्तान्तरण गरेको हो ।

बैंकका सहायक महाप्रबन्धक हरि प्रसाद आचार्यले बैंकका सिएसआर प्रमुख सुमन थापा र कान्तिपथ शाखा प्रमुख अनिल महर्जनको उपस्थितीमा विद्यालयका प्रधानाध्यापक श्रीमती शिव कुमारी बराल घिमिरेलाई उक्त सामान हस्तान्तरण गरेका हुन् । साथै बैंकद्वारा ललितपुर एकान्तकुनास्थित महेन्द्र भृकुटी माध्यमिक विद्यालयमा पनि सो मेसिन हस्तान्तरण गरेको जनाएको छ ।

यसैगरी बैंकले मोलुङ्ग, किन्जा, डुम्रे, देउराली, बाग्लुङ्ग, वालिङ्ग, कावासोती, बर्दिवास, तेह्रथुम, विरेन्द्रनगर लयागतका ठाउँहरुमा उक्त प्याड मसिनहरु हस्तान्तरण गरिसकेको जनाएको छ ।