हामी सबैकाे संसारन्यूज

काठमाडौं । वाग्नर समूहका लडाकुहरूले रुसविरुद्ध गरेको विद्रोहको प्रयास असफल भएको छ । विद्रोहको घोषणा गरेको २४ घण्टाभित्रै वाग्नर समूह पछि हटेको छ ।

विद्रोह असफल भएपछि वाग्नर समूहका प्रमुख येभगेनी प्रिगोजिन बेलारुस लागेका छन् । उनले यसअघि नै रक्तपातबाट बच्न आफ्ना लडाकुहरूलाई युक्रेन फर्कन आग्रह गरेका थिए। योसँगै रसियामा नाटकीय रुपमा सुरु भएको विद्रोहको प्रयास पनि अन्त्य भएको मानिएको छ ।

वाग्नर पैसाका लागि लड्ने भाडाको निजी सैन्य समूह हो । हालसम्म युक्रेन युद्धमा वाग्नर समूहका लडाकूहरू रुसी सेनासँग मिलेर लडिरहेका थिए ।

तर, युक्रेनविरुद्धको लडाइँकै बीच रुसी सेना र वाग्नर समूहबीच मतभेद सिर्जना भएको थियो । वाग्नरका प्रमुख प्रिगोजिनले पछिल्ला समयमा रुसको सैन्य नेतृत्वको खुलेर आलोचना गर्ने गरेका थिए ।

यसबीचमा शनिवार वाग्नर र रुसी सेनाबीचको तनाव बाहिर आएको थियो । ​वाग्नरका लडाकूहरू युक्रेनमा रहेको आफ्नो शिविरबाट बाहिर निस्केर दक्षिणी शहर रोस्तोभ–अन–डोन पुगे र रूसी सेनाको दक्षिणी कमान्डको मुख्यालय कब्जा गरे। त्यहाँबाट उनीहरू रुसको राजधानीतर्फ पनि अघि बढ्न थालेको खबर आएको थियो ।

दक्षिणी कमाण्डको मुख्यालय कब्जापछि वाग्नर समूह उत्साहित बनेको थियो भने मस्कोमा त्रास सिर्जना भएको थियो । मस्कोमा उच्च सुरक्षा व्यवस्था गरिएको थियो भने स्थानीयलाई बाहिर निस्कन रोकिएको थियो ।

बेलारुसको पहलपछि रोकियो तनाव

वाग्नर समूह मस्कोतर्फ अगाडि बढ्दै बढ्दै गर्दा चेचन्याको विशिष्ट सैन्य बल पनि मस्कोतर्फ अगाडि बढ्दै गरेको रिपोर्टहरु आए । वाग्नर समूहसँग चेचन्या लडाकु भिड्ने समाचार बाहिरियो ।

राष्ट्रपति पुटिनले पनि वाग्नर समूहलाई दुस्साहसको जवाफ कडा पाउने चेतावनी दिए । तनाव उच्च रहेकै अवस्थामा एक्कासी शनिबार साँझ स्थितिलाई नियन्त्रण लिने सहमति भएको विषय बाहिरियो । रुसको टेलिभिजनले युद्ध नहुने सन्देश दियो ।

बेलारुसका नेता अलेक्जेन्डर लुकाशेन्को र वाग्नर समूह प्रमुख प्रिगोजिनबीचको लामो संवादपछि युद्ध नगर्ने सहमति भयो । साथै, रुसले कुनै पनि मुद्दा नलगाउने सहमति पनि भयो । जसपश्चात येभगेनी प्रिगोजिनले एक विज्ञप्ति जारी गर्दै रक्तपात रोक्न पछि हटेको सन्देश दिए । बीबीसीको सहयोगमा