हामी सबैकाे संसारन्यूज

महेश दाहाल, दोहा । प्रवासको पसिना स्वदेशको साकार सपना भन्ने मुल नारासहित स्थापना भएको खोटाङ सेवा समाज कतारले मृगौला रोगी रमेश नेपालीलाई आर्थिक सहयोग गरेको छ ।

खोटेहाङ गाउँपालिका -९ लिच्किराम्चेका रमेश नेपाली बिगत लामो समयदेखि मृगौला रोगको उपचार गराइरहेको तथा निजको आर्थिक अवस्था कमजोर भएको कारण उपचारमा सहयोग गर्न निकटतम आफन्तजन तथा साथिहरुलाइ अनुरोध गरेका थिए । खोटाङ सेवा समाज कतारका साधारण सदस्य नारायण पराजुलीमार्फत आएको प्रस्ताव अनुसार समाजले आर्थिक सहयोग गरेको हो ।

सस्थाको मासिक बैठकमा आएको प्रस्ताव माथि छलफल गर्दै बिरामी नेपालीलाइ आर्थिक सहयोग संकलनको लागि सहकोषाध्यक्ष राम मगरको संयोजकत्वमा संकलित र सस्थाको कोषबाट केही रकम थप गरेर रु ४२ हजार ७ सय सस्थाका पुर्व सल्लाहकार चन्द्रशेर राई मार्फत हस्तान्तरण गरेको छ ।

राष्ट्रिय मृगौला रोग उपचार केन्द्रमा उपचाररत नेपालीलाई सहयोग गरेको खोटाङ सेवा समाज कतारले जिल्लामा स्वास्थ्य क्षेत्रमा सहयोग पुर्याउने हेतुले एम्बुलेन्स सहित विभिन्न सहयोग गर्नुका साथै शिक्षा र खेलकुदको क्षेत्रमा पनि उल्लेखनीय सहयोग गरेको छ ।

सस्थाका अध्यक्ष कैलाश श्रेष्ठले अब छिट्टै केही नयाँ योजना सहित जिल्लाको शैक्षिकस्तर सुधारको लागि नया कार्यक्रम ल्याउन लागिएको बताए ।