हामी सबैकाे संसारन्यूज

काठमाडौं । कोशी प्रदेशका मुख्यमन्त्री हिक्मतकुमार कार्कीले राखेको विश्वासको मतसम्बन्धी प्रस्ताव अस्वीकृत भएको छ । शुक्रबार प्रदेशसभामा प्रस्तावमाथि भएको मतदानमा तत्काल कायम सदस्यको बहुमत नपुगेकाले अस्वीकृत भएको हो ।

सभामुख बाबुराम गौतमले विश्वासको मतसम्बन्धी प्रस्तावको पक्षमा तत्काल कायम प्रदेशसभाको बहुमत प्राप्त नगरेकाले अस्वीकृत भएको घोषणा गरे ।

कार्कीले राखेको प्रस्तावको पक्षमा ४६ र विपक्षमा ४३ मत परेको छ । तर, ९३ सदस्यीय प्रदेशसभामा बहुमतका लागि ४७ सांसदको समर्थन चाहिन्छ ।

कार्कीले राखेको प्रस्तावको पक्षमा नेकपा (एमाले) र राष्ट्रिय प्रजातन्त्र पार्टीले मतदान गरेका थिए भने विपक्षमा नेपाली कांग्रेस, नेकपा (माओवादी केन्द्र) र एकीकृत समाजवादीले मतदान गरेका छन् । जनता समाजवादी पार्टीकी प्रदेश सांसद निर्मला लिम्बूका साथै प्रतिपक्षी दलका थप दुई गरी तीन जना प्रदेश सांसद अनुपस्थित रहे ।

यससँगै नेकपा (एमाले) नेतृत्वको एक मात्रै प्रदेश सरकार ढलेको छ । अब कोशीमा नयाँ सरकार गठन प्रक्रिया सुरु हुनेछ ।