Sansar News
काठमाडौं । प्रमुख प्रतिपक्षी दल नेकपा (एमाले)ले प्रधानमन्त्री पुष्पकमल दाहाल प्रचण्डको राजीनामा माग गरेको छ । बुधबार बसेको संसद बैठकमा एमालेले प्रितम सिंहबारे प्रधानमन्त्री प्रचण्डले दिएको अभिव्यक्ति आपत्तिजनक भएको भन्दै एमालेले राजीनामा दिनुपर्ने माग गर्यो ।
संसद बैठकमा बोल्दै एमाले सांसद रघुजी पन्तले भने, “प्रधानमन्त्रीले जे बोल्नुभयो, नैतिकताका आधारमा उहाँ प्रधानमन्त्री पदमा बस्न हुँदैन, उहाँले राजीनामा गर्नुपर्छ ।”
उनले प्रधानमन्त्री प्रचण्डलाई ‘लेण्डुप दोर्जेको नेपाली संस्करण’ हुन खोजेको आरोप लगाए । “नेपाली जनतालाई स्वाभिमानी प्रधानमन्त्री चाहिएको हो, राष्ट्रियताको पक्षमा अडान लिनसक्ने प्रधानमन्त्री चाहिएको हो, लेण्डुप दोर्जेको नेपाली संस्करण चाहिएको होइन”, उनले भने ।
एमालेले प्रधानमन्त्रीको राजीनामा नआएसम्म संसद चल्न नदिने अडान लिएको छ । एमालेको अडानपछि संसद बैठक स्थगित भएको छ ।
वि.सं.२०८० असार २० बुधवार १६:३४ मा प्रकाशित
