हामी सबैकाे संसारन्यूज

काठमाडौं । नेकपा (एकीकृत समाजवादी) पार्टीका महासचिव घनश्याम भुसालले नयाँ र स्वतन्त्र भनिएका पार्टीहरुको हालत छिट्टै पुरानाको जस्तै हुने बताएका छन् ।

पार्टीनिकट कानुन व्यवसायीहरुद्वारा काठमाडौंमा आयोजित एक कार्यक्रममा महासचिव भुसाले राष्ट्रिय स्वतन्त्र पार्टी लगायत नयाँ भनिएका दलहरुको दलाल, पूँजीवादमाथि प्रश्न नउठाएको भन्दै उनीहरुको हविगत छिट्टै पुराना दलहरुको जस्तो हुने बताए ।

‘अहिले राजनीतिक जुन नयाँ भन्ने चिज आईराख्या छ, स्वतन्त्र भन्ने जुन चिज आईराख्या छ । तिनको पनि त्यही हविगत हुन्छ । किनभने ती कसैले पनि यो दलाल, पूँजीवादमाथि प्रश्न उठाएका छैनन्,’ उनले भने, ‘त्यसअर्थमा त्यस्तो सुशासनको कुरा उठाएका छैनन्, जसले रोजगारी सृजना हुन्छ र, हाम्रा बच्चाबच्चीहरुले नयाँ जिन्दगीका लागि रोजगारी पाउँछन् । त्यो भन्दा राम्रो रोजगारी पाउँछन् । यसतर्फ उनीहरुका पनि मुद्दा केन्द्रित छैनन् ।’

उनले सैद्धान्तिक रुपमा नेकपा (एकीकृत समाजवादी पार्टी नै त्यो पार्टी रहेको बताए । ‘यसको अर्थ हो– राजनीतिक रुपमा हामीले अझ धेरै गर्न बाँकी छ । राजनीतिक रूपमा तिमीहरूले के ग¥यौ भन्नु हुुन्छ भने मैले धेरै कमी छ भन्छु । मेरै पार्टीमा पनि धेरै कमजोरी छन्’ सांगठनिक रुपमा बहुत धेरै कमजोरीहरू छन् । तर, आज यो सारा सन्नाटामा एउटा राम्रो कुरा के हो, जुन कुरा हामीले दाबी गर्दै आएको छौं ।’ उनले भने ।

सैद्धान्तिक रुपमा आजको युगको समस्या के हो भन्ने कुरा एकीकृत समाजवादी पार्टीले टुंग्याएको बताए । ‘ यसको कुनै च्यालेन्ज छैन। यसको कुनै अर्को उत्तर अरुले दिएको छैन। यस अर्थमा सैद्धान्तिक रुपमा हामी ठिक ठाउँमा टेकेका छौ ।’