हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल प्रचण्डले अरुले भनेर नभई आफ्नो अन्तरआत्माले भनेमा एकमिनेट पनि प्रधानमन्त्री पदमा नबस्ने बताएका छन् ।

भारतीय नागरिक सरदार प्रितम सिंहको पुस्तक विमोचनका बेला प्रधानमन्त्रीले बोलेको कुरालाई लिएर प्रमुख प्रतिपक्षी दल एमाले तथा राप्रपा नेपाल लगायतका प्रतपक्षी दलले संसदमै नैतिकताका आधारमा राजीनामा दिनपर्ने माग गरिहेका बेला प्रचण्डले आज संसदमा त्यसको जवाफ दिँदै यस्तो कुरा बताएका हुन् ।

‘प्रतिपक्षीले माग गरिहाल्ने सत्तापक्ष भागिहाल्ने हो भने यो देशको गति के हुन्छ ? यदि अहिले मैले त्यसो गरे भने भोली तपाई प्रधानमन्त्री हुँदा के गर्ने ? ‘तपाईलाई पनि त त्यस्तै हुने होला नि !’ राष्ट्रिय प्रजातन्त्र पार्टीका अध्यक्ष तथा सांसद राजेन्द्र लिङ्देनले नैतिकताका आधारमा पदमा बस्न नहुने भन्दै गरेको प्रश्नमा उनले भने ।

‘माननीय राजेन्द्रजी भर्खरै दुई कार्यकाल भयो,पहिलाको कुरा हेर्नुभयो भने दुई/दुईपटक मैले प्रधानमन्त्रीबाट राजीनामा दिँदा तपाईले पढ्नु भा छ, कस्तो परिस्थितिमा राजीनामा दिए, के आधारमा दिए ? त्यसलाई गहिरो गरी छातिमा हात राखेर विचार गर्न अनुरोध गर्छु, नैतिकता कस्ले देखायो यो देशमा, कस्ले देखाएन ? त्यो विवेचना गर्न म अनुरोध गर्दछु ।’

दुवैपटक नैतिकताको धरातलमा टेकेर आफुले प्रधानमन्त्री पदबाट राजीनामा दिएको बताउँदै अहिले पनि अरुले नभई आफ्नो अन्तरआत्माले भनेमा एकमिनेट पनि नबस्ने उनले बताए ।

उनले यस्ता विषयलाई हल्का फुल्का रुपमा नलिन आग्रह गर्दै लोकतन्त्रमा मतभेद हुनु स्वभाविक रहेको तर राष्ट्र र जनताको स्थिति जटिल परिस्थितिमा रहेको बेला यस्ता कुरामा अल्झिन नहुने बताउँदै उनले भने–यो परिस्थितिमा यस्सो केही लाग्ने वित्तिकै संसद अवरोध गरिहाल्ने परम्परालाई हामीले रोकौं । संवाद, छलफल, बहस र आ–आफ्न कुरा सशक्त तर्कसंगत र तथ्यपूर्ण ढंगले राख्ने परम्परा हामीले सृष्टि गर्न सकिदैन ? संसद अवरोध गरिहाल्नु पर्छ ?’

उनले दलगत परम्पराबाट जनता आजित भइसकेको स्मरण गर्न समेत अनुरोध गरे ।