हामी सबैकाे संसारन्यूज

काठमाडौं । नेकपा (एकीकृत समाजवादी)का अध्यक्ष माधवकुमार नेपालले ललिता निवास प्रकरणमा छानबिनका लागि आफू खुला रहेको बताएका छन् । उनले सरकारले गर्ने छानबिनमा आफूले सघाउने बताए ।

मंगलबार पाल्पामा सञ्चारकर्मीसँग कुराकानी गर्दै उनले भने, “ललिता निवास जग्गामा मेरो नाम पनि जोडेर आएको छ, छानबिन गरी उचित न्याय हुनुपर्छ, तर म आत्तिएको छैन, नाम जोडियो भन्दैमा कोही आत्तिनु पर्दैन,न्यायसंगत ढंगले छानबिन हुन्छ भन्नेमा मलाई विश्वास छ ।”

उनले जग्गा हिनामिना भइरहँदा थुप्रै नेताहरु प्रधानमन्त्री भएको भन्दै आफ्नो नाम जोडिने विषय गम्भीर नहुने बताए । देशैभरी सरकारी तथा सार्वजनिक जग्गाहरु मिचिएको भन्दै अध्यक्ष नेपालले आफू र आफ्नो सबैतिर छानबिनको पक्षमा रहेको स्पष्ट पारे ।

“नेपाल ट्रष्टदेखि सबै सरकारी जग्गाको छानबिन गर्नुपर्छ, त्यसो भयो भने आम मान्छे डराउँछन्, जसले गर्दा अनियमितता, अतिक्रमण रोकिन्छ, र भ्रष्टाचार पनि नियन्त्रण हुन्छ”, उनले भने ।

अध्यक्ष नेपालले वर्तमान सरकार पाँचै वर्षसम्म जाने पनि बताएका छन् । गठबन्धनभित्र सरकारको नेतृत्वको सन्दर्भमा र सरकारका कदममा सहमति रहेको उनले बताए ।