हामी सबैकाे संसारन्यूज

काठमाडौं । वाणिज्य बैंकहरुले ब्याजदरमा गर्दै आएको भद्र सहमति तोडेका छन् । नेपाल बैंकर्स संघको बुधबार बसेको बैठकले भद्र सहमति तोड्दै बैंक आफैंले ब्याजदर निर्धारण गर्ने सहमति गरेको हो ।

पछिल्लो सहमतिसँगै ब्याजदर निर्धारणमा यसअघिदेखि चल्दै आएको कार्टेलिङको पनि अन्त्य भएको छ ।

हालसम्म बैंकर्सहरुको साझा संस्था बैंकर्स संघले बैंकहरुको ब्याजदर तय गर्दै आएको थियो । संघले तय गरेको कारण सबै वाणिज्य बैंकहरुको ब्याजदर उस्तै थियो ।

यसरी ब्याजदर मिलेर तय गर्ने गरेकोप्रति विभिन्न क्षेत्रबाट विरोध भइरहेको थियो ।

हालै अर्थमन्त्री डा. प्रकाशशरण महतले ब्याजदरमा भइरहेको कार्टेलिङ अन्त्य हुनुपर्ने बताएका थिए । खुल्ला अर्थतन्त्रको नीतिमा बैंकहरुबीच स्वस्थ प्रतिस्पर्धा हुनुपर्ने र ब्याजदर निर्धारणको अधिकारसमेत बजारलाई छाडिनुपर्ने बताएका थिए ।

विगत केही समयदेखि नै उद्योगी तथा व्यवसायी पनि बैंकको ब्याजदरमा भएको कार्टेलिङको अन्त्य गरिनुपर्ने माग राख्दै आन्दोलनमा थिए । पछिल्लो निर्णयसँगै उक्त आन्दोलनको विषय पनि सम्बोधन भएको छ ।