हामी सबैकाे संसारन्यूज

काठमाडौं । नेपाल वायु सेवा निगमले भैरहवा गौतमबुद्ध अन्तराष्ट्रिय विमानस्थलबाट हङकङ र दिल्लीका लागि उडान गर्ने भएको छ ।

निगमले आज एक विज्ञप्ति जारी गर्दै काठमाडौंलाई ट्रान्जिट बनाएर हङकङ र दिल्ली उडान गर्न लागेको जनाएको हो । निगमका अनुसार यहि भदौ १२ गते (२९ अगस्त) देखि नियमित रुपमा उडानका लागि बुकिङ खुला गर्ने भएको हो ।

निगमले जारी गरेको विज्ञप्तिमा उडान तालिका अनुसार बिहान ८ः१५ मा भैरहवाबाट उडेको जहाज ९ बजे काठमाडौंमाा अवतरण गर्ने र तत्पश्चात ट्रान्जिट भइ हङकङ जाने यात्रु हङकङ जाने उडानमा र दिल्ली जाने यात्रु दिल्ली निगमकै कनेक्टिङ उडानमा चढ्ने छन् । यात्रुको सुविधाका लागि चेक इन गर्दाका बखत गन्तव्य सम्मकै बोडिङ पास दिने र लगेज सिधै गन्तव्यमा लिने व्यवस्था मिलाईएको पनि जनाइएको छ ।
राष्ट्रिय गौरवको आयोजना अन्तर्गत निर्माण भएको गौतमबुद्ध अन्तराष्ट्रिय विमानस्थलबाट उडान भर्ने कार्य तदारुकताका साथ गर्नका लागि सस्कृति, पर्यटन तथा नागरिक उड्डयन मन्त्रालयसँगको समन्वयमा निगम व्यवस्थापनले विशेष पहल गरी उडान सुरु गर्ने निर्णय गरेको पनि निगमले जनाएको छ ।