Sansar News
काठमाडौँ । सप्तकोशीमा फाल हानेका चिकित्सक प्रज्वल कोइरालाको शव भेटिएको छ । बराहाक्षेत्रबाट सप्तकोशीमा फाल हानेका चिकित्सक कोइरालाको शव १० दिनपछि भेटिएको हो ।
झापाको दमक नगरपालिका-१ का चिकित्सक कोइराला बेपत्ता भएको १० दिन पछि भेटिएको हो । उनले भदौ १० गते उदयपुरको बेलका नगरपालिका-८ स्थित सप्तकोशी नदीको पुल छेउमा कार पार्किङ गरेर नदीमा फाल हानेको प्रहरीले जनाएको छ ।
घटना भएको १० दिनपछि सुनसरीको बराहक्षेत्र नगरपालिका-२ स्थित कोशीले टापु बनाएको क्षेत्रमा कोइरालाको शव भेटिएको प्रहरीले जनाएको छ । कोइराला मोरङको उर्लाबारीस्थित मदन भण्डारी ट्रमा सेन्टरमा कार्यरत थिए ।
कोशीमा माछा मार्नेहरूले शव तैरिरहेको देखेपछि प्रहरीलाई खबर गरेका थिए । कोइरालाको आत्महत्याको कारण प्रेम सम्बन्ध भनिए पनि अनुसन्धानकै क्रममा रहेको प्रहरीले जनाएको छ ।
वि.सं.२०८० भदौ २० बुधवार १२:३४ मा प्रकाशित
