हामी सबैकाे संसारन्यूज

नुवाकोट । गाडीसहित अपहरण गरी बन्धक बनाएर रकमको माग गर्ने दुईजनालाई प्रहरीले पक्राउ गरेको छ ।

ककनी गाउँपालिका–४ बस्ने ५६ वर्षीय सूर्य बहादुर तामाङलाई अपहरण गरी बन्धक बनाएको अभियोगमा प्रहरीले मंगलबार दुई जनालाई पक्राउ गरेको हो । पक्राउ पर्नेमा ककनी गाउँपालिका–४ का ३० वर्षीय राजकुमार तामाङ र शिवपुरी गाउँपालिका– ८ बस्ने २४ वर्षीय चन्द्र बहादुर तामाङ रहेका छन् ।

उनीहरूले बा.६ ज ७७७९ नम्बरको गाडीमा आएका सूर्य बहादुरलाई माघ २२ गते राति ककनी गाउँपालिका–४ काउलेदेखि ककनी जाने सडकबाट बन्धक बनाई गाडी सहित अपहरण गरेर पन्चकन्या गाउँपालिकाको कबिलास जाने सडकको एकान्तमा लगेर बन्धक बनाएका थिए ।

जिल्ला प्रहरी कार्यालय नुवाकोटबाट खटिएको प्रहरीले प्रहरी वृत्त बालाजुको सहयोगमा रकम लिन आएको अवस्थामा दुवै जनालाई काठमाडौं महानगरपालिका–१६ माछापोखरीबाट पक्राउ गरेको हो । साथै प्रहरीले सूर्य बहादुरलाई सकुशल अपहरणमुक्त समेत गरेको छ ।

उनीहरू उपर जिल्ला अदालत नुवाकोटबाट अपहरण तथा शरीर बन्धक मुद्दामा ७ दिन म्याद थप अनुमति लिई प्रहरीले आवश्यक अनुसन्धान गर्नुका साथै घट्नामा संलग्न अन्य व्यक्तिहरूको खोजी गरिरहेको छ ।