हामी सबैकाे संसारन्यूज

काठमाडौँ । संसद् भवनभित्र मृत अवस्थामा फेला परेका प्रहरी जवानले आत्महत्या गरेको प्रहरीले प्रारम्भिक निष्कर्ष निकालेको छ ।

दोलखाको मेलुङ गाउँपालिका–४ घर भएका २२ वर्षीय प्रहरी जवान अजित गोलेले आफैँले बोकेको इन्सास राइफलले आफैँलाई गोली हानेको पाइएको जिल्ला प्रहरी परिसर काठमाडौँका एसपी तथा प्रवक्ता नवराज अधिकारीले बताए ।

एसपी अधिकारीका अनुसार गोलेले आफ्नै निधारमा गोली हानेका हुन् । उनको शव बुधवार बिहान संसद् भवनको पश्चिमतर्फको दुई नम्बर गेटको बायाँतर्फ शौचालयमा भेटिएको थियो ।

उनी आजै बिहान छ बजेदेखि १० बजेसम्मको ड्युटी पालोमा दुई नम्बर गेटमा हतियारसहित सुरक्षार्थ खटिएका थिए । प्रहरीको केन्द्रीय विशेष कार्यदलमा दरबन्दी रही उनी संसद् भवनमा खटिँदै आएका थिए ।