हामी सबैकाे संसारन्यूज

काठमाडौं । आज प्रतिनिधिसभा बैठक बस्दै छ । बैठक आज बिहान ११ बजे संसद भवन नयाँ बानेश्वरमा बस्दै छ ।

आज बस्ने प्रतिनिधिसभा बैठकमा प्रधानमन्त्री पुष्पकमल दाहाल ‘प्रचण्ड’ले सांसदहरुले सोधेका प्रश्नको जवाफ दिने भएका छन् । आजको बैठकमा प्रधानमन्त्रीसँग सांसदहरुले प्रत्यक्ष प्रश्नोत्तर गर्ने कार्यसूची रहेको छ ।

प्रधानमन्त्री ‘प्रचण्ड’ले प्रतिनिधि सभा नियमावली, २०७९ को परिच्छेद-९ बमोजिम सदस्यहरुले उठाएका प्रश्नको जवाफ दिने संसद सचिवालयले जनाएको छ ।

त्यसैगरी, आजको बैठकमा विनियोजन विधेयकमाथिको छलफलमा उठेको प्रश्नको जवाफ सम्बन्धित मन्त्रीहरुले दिने कार्यसूची रहेको छ ।

आजको बैठकमा उद्योग, वाणिज्य तथा आपूर्ति मन्त्रालय, भूमि व्यवस्था, सहकारी तथा गरिबी निवारण मन्त्रालय, कृषि तथा पशुपंक्षी विकास मन्त्रालय, कानुन, न्याय तथा संसदीय मामिला मन्त्रालय, सञ्चार तथा सूचना प्रविधि मन्त्रालय, सँस्कृति, पर्यटन तथा नागरिक उड्डयन मन्त्रालय र संघीय मामिला तथा सामान्य प्रशासन मन्त्रालयको विनियोजन विधेयकमाथिको छलफलमा उठेको प्रश्नको जवाफ सम्बन्धित मन्त्रीहरुले दिने कार्यसूची रहेको सचिवालयले जनाएको छ ।