हामी सबैकाे संसारन्यूज

काठमाडौँ । रेलमार्गको सर्भे गर्न आएका टोलीको गाडीमा आगजनी भएको छ । चितवनका स्थानीयले बुधवार दिउँसो भरतपुर महानगरपालिका वडा नम्बर ७ कृष्णपुर पुगेको आरएच कन्सल्टेन्सीको गाडीलाई नियन्त्रणमा लिएर आगजनी गरेका हुन् ।

उनीहरूले नियन्त्रणमा लिएको गाडीमा आगजनी गरेको जिल्ला प्रहरी कार्यालय चितवनका प्रहरी प्रवक्ता डीएसपी भेषराज रिजालले बताए ।
सर्भे गर्दागर्दै करिब दुइ सय जना स्थानीय भेला भएर सो टिमलाई नियन्त्रणमा लिएको बताइएको छ । गाडीमा लागेको आगो भरतपुर महानगरपालिकाको दमकलले निभाएको थियो ।

पूर्वपश्चिम रेलमार्ग भरतपुरका विभिन्न घना बस्ती भएका वडाबाट जाने गरी सर्भे गरिएको भन्दै स्थानीय बासिन्दाले चरणबद्ध सङ्घर्षका कार्यक्रम गर्दै आएका छन् । बस्तीलाई उजाड बनाएर रेल मार्ग लैजान नदिने र अहिले गरिएको सर्भे नै परिवर्तन गर्नुपर्ने माग उनीहरूले गर्दै आएका छन् ।