हामी सबैकाे संसारन्यूज

काठमाडौ । एक वर्षको अन्तरालमा २१ वटा क्यासिनोले राजस्व बुझाएर दर्ता नवीकरणपत्र लिएका छन् । पर्यटन विभागका अनुसार अघिल्लो आर्थिक वर्षको अन्त्य सम्म ती क्यासिनोबाट एक अर्ब ३३ करोड ७८ लाख ९२ हजार दुई सय रुपैयाँ राजस्व सङ्कलन भएको छ ।

सरकारले सबै क्यासिनो तथा मनोरञ्जन खेल सञ्चालनको अनुमतिपत्र (लाइसेन्स) प्राप्त कम्पनीलाई २०८१ असार मसान्तभित्र राजस्व बुझाउन अल्टिमेटम दिएको थियो । समयमै राजस्व नबुझाउने त्यस्ता कम्पनीको दर्ता खारेज गर्ने सरकारको चेतावनी थियो ।

होटल, पर्यटन तथा क्यासिनो दर्ता, नवीकरणको जिम्मेवारी पर्यटन विभागलाई दिइएको छ । विभागका अनुसार ८ वटा ठुला क्यासिनोबाट ४० करोड रुपैयाँ राजस्व र १० करोड रुपैयाँ नवीकरण दस्तुर उठेको छ ।

यस्तै, १३ वटा साना तथा मझौला खालका (आधुनिक मेसिन वा उपकरणको माध्यमबाट मात्र खेलाइने) क्यासिनोबाट १९ करोड ५० लाख रुपैयाँ राजस्व र ६ करोड ५० लाख रुपैयाँ नवीकरण शुल्क उठेको विभागले जनाएको छ ।