काठमाडौँ । द ब्रिटिस कलेजका संस्थापक राजेन कँडेल ‘द पावर हाउस बिजनेस लिडर २०२४’द्वारा सम्मानित भएका छन् । सो उपाधि प्राप्त गरेपछि विश्व प्रसिद्ध विजनेस म्यागेजिन सिआईओ टुडेको ‘ग्लोबल टाइटन’ संस्करणमा कँडेलको प्रेरणा युक्त भनाइसहितको फिचर पनि प्रकाशित भएको छ ।
सो म्यागेजिनमा व्यवसायी कँडेलको नेपालदेखि बेलायतसम्मको यात्राका प्रेरणायुक्त भोगाइसहित उनका भनाइहरू छापिएका छन् । सो म्यागेजिनमा कँडेलले आफ्नो सफल व्यवसाय र शिक्षामा दूरदर्शितासहितको नेतृत्व हुनुपर्नेमा जोड दिएका छन् ।
‘द पावर हाउस बिजनेस लिडर २०२४’ को सो संस्करणमा कँडेलले शैक्षिक यात्राका अवधिमा उनले भोगेका भोगाइ तथा उपलब्धिहरूलाई प्रमुखताका साथ स्थान दिएको छ ।
विद्यार्थीदेखि शैक्षिक नेतृत्वसम्म
फिचरमा कँडेलले नेपालमा सञ्चालनमा रहेको प्रतिष्ठित द ब्रिटिस कलेज र संसारभर सञ्चालनमा रहेका द कँडेल ग्रुप तथा द ब्रिटिस एजुकेसन ग्रुपलगायत व्यवसायीक प्रतिष्ठान तथा कम्पनीहरूमा आफ्नो भूमिका बारे चर्चा गरेका छन् ।
उक्त फिचरमा कँडेलले आफ्नो संझनालायक विगत, नेपालमा जन्मे हुर्केदेखि बेलायतको लन्डनमा आफूले अध्ययन गरेको विषयसमेत समेटेका छन् भने आफूले पहिलो पटक लन्डनमा कलेज स्थापना गरेको कुरालाई पनि उठान गरेका छन् । उनले युनिभर्सिटी कलेज अफ लन्डनबाट हायर एजुकेसन अफ म्यानेजमेन्टमा एमबिए गरेका हुन् ।
‘द पावरहाउस बिजनेस लिडर २०२४’ मा दरिएको सम्बन्धमा कँडेलले भने ’मेरा लागि सफलता भनेको शिक्षा र अवसरको माध्यमबाट अरूलाई सशक्त बनाउनु हो। शिक्षामा मेरो यात्रा सरल लक्ष्यका साथ सुरु भएको हो भने सिकाउने प्रक्रियालाई पहुँचयोग्य र प्रभावकारी बनाउने मेरो अभियान जारी रहनेछ ।’
कँडेल ग्रुपका प्रमुख कार्यकारी अधिकृत(सिइओ)समेत रहेका कँडेल आफ्नो दूरदर्शी नेतृत्वसहितको छविका कारण व्यवसायमा फड्को मारिरहेका छन् ।
वि.सं.२०८१ साउन १० बिहीवार १५:०३ मा प्रकाशित
