हामी सबैकाे संसारन्यूज

सुनिल अधिकारी
स्वयम्भू डल्लु, काठमाडौं

१.
अव्यक्त सारा भावनाहरूले मूर्त रूप लिए जस्तै
जन्मौंको प्यास मानौं एकै घुट्कोमा पिए जस्तै
जिउने ढङ्ग नजान्दा जिन्दगी थोरै लाग्न सक्छ
जान्नेलाई एकै जीवन, हजार जीवन जीए जस्तै !

२.
आफूले चाहेको जस्तो संसार बदलिने भए
बोलेको कुरा जस्तो विचार बदलिने भए
कति धेरै चेहराहरू नाङ्गीन्थे होलान् यहाँ
मन बदलिएको जस्तो अनुहार बदलिने भए !

३.
सत्कर्म गर्ने चाहना सब मन पवित्रबाट उठोस्
भलो गर्ने भावना अन्तःकरण भित्रबाट उठोस्
अग्लो त छायाँ पनि हुन्छ, मनले ठूलो हुनू
बास्ना तिम्रो शरीर होइन, चरित्रबाट उठोस् !

४.
धेरै बिन्ति गरें काललाई मान्छ कि भनेर
मलाई पनि बरु आफूसँगै लान्छ कि भनेर
तिमीलाई जस्तै धेरै माया गरें दुःखलाई पनि
तिमीले जस्तै मलाई छोडी जान्छ कि भनेर !

५.
चिरा परेको छ यो मन, बाहिर खुशी झल्किएपनि
धुवाँ बाहिर देखिन्न कतै, भित्र मन सल्किएपनि
पारखी मन पो चाहिन्छ, हीरा र कीरा चिन्नलाई
यो मन जस्तो त्यो मन छैन जतिसुकै टल्किएपनि !