Sansar News
भुवन शिवाकोटी ‘चौघरे’
काठमाडौ
नसोचेको समय आयो
चुलोबाट
कोइला भनेर आगो टिप्नेहरू
आफ्नै दलानमा
हात जलेर उफ्रिदैछन्
अर्कोतिर
उही दलानमा
अँगालोभरी कालो कोइला बोकी बोकी
कोइला सेतो छ भन्नेहरू छन्
विवादको दलानमा
सेतो कोइला कालो देखिएको दिन
अँगार चिन्नेहरू
र
अँगार चिन्दा चिन्दै नचिने झैं गर्नेहरूको माझमा
हामीले
पर्गेल्नु छ दुधको मनितो
सिमा रेखाको चेपे नदीमा
आमाले बगाएको स्तनधारा बगिरहेछ
वा
कालामाटी मिसिएको छ
वा
रगतको रङ् नै फेरिएको हो
र उनीहरू
एउटै कुरा
कोही सेतो देखिरहेछन्
कोही कालो देखिरहेछन् ।
वि.सं.२०८१ भदौ १ शनिवार ०५:१५ मा प्रकाशित
