काठमाडौँ । शिक्षामन्त्री विद्या भट्टराईले सुरक्षाको माग गरेकी छन् । त्रिभुवन विश्वविद्यालयका पदाधिकारीलाई धम्की आएको भन्दै उनले सुरक्षा माग गरेकी हुन् । भट्टराईले केही दिनयता त्रिभुवन विश्वविद्यालयका पदाधिकारीमाथि टेलिफोनमार्फत धम्की आइरहेको बताएकी छन् ।
उनले सामाजिक सञ्जालमा लेखेकी छिन, ‘त्रिभुवन विश्वविद्यालयमा केही दिनदेखि पदाधिकारीहरूमाथि हमला गर्न खोज्नु र प्राध्यापकहरूलाई फोन गर्दै धम्की दिने गरेको कारण सिँगो विश्वविद्यालय असुरक्षित बनेको छ । त्रिभुवन विश्वविद्यालयमा सुरक्षाका लागि व्यवस्थित प्रबन्ध गर्न म गृहमन्त्रीसँग जोडदार माग गर्दछु ।’
आवश्यक सुझाव दिनेहरुप्रति आभार व्यक्त गर्दै उनले भनेकी छन्, ‘मैले सार्वजनिक अपिल गर्नुपर्ने भएर नै गरेको हो । कुनै आवेगमा आएर लेखेको होइन । मैले पाँच दिनदेखि लगातार सम्पर्क र समन्वय गरेको जानकारी गराउन चाहन्छु ।’
वि.सं.२०८१ भदौ ५ बुधवार १०:५७ मा प्रकाशित
