काठमाडौँ । प्रहरीको केन्द्रीय अनुसन्धान ब्युरो (सीआईबी)को टोली सुप्रिम सहकारीमा भएको ठगी अनुसन्धान गर्न बुठवल पुगेको छ ।
राष्ट्रिय स्वतन्त्र पार्टीका सभापति रवि लामिछानेलाई उक्त सहकारी ठगीमा पनि जोडिएको आरोप गएको असोज ५ गते सहकारीपीडित नारायणबहादुर पहराईलगायतले रवि लामिछानेसहित १२ जनाविरुद्ध इलाका प्रहरी कार्यालय बुटवलमा पूरक जाहेरी दिएका थिए । अहिले सुप्रिम सहकारीको पूरक जाहेरीमा अनुसन्धान चलिरहेको विशेष स्रोतले जनााएको छ ।
बिहीबार जिल्ला अदालत रुपन्देहीले उनीहरूलाई पक्राउ गरेर अनुसन्धान गर्न प्रहरीलाई अनुमति दिइसकेको छ । अदालतले छविलाल जोशी, दीपक लामा, अनन्त बाबु राई, श्री वल्लभ नेपाल, विशाल तामाङ, रविना रिमाल, भगवती बम्जन, विज्ञान राई, सुरक्षा अधिकारी, नरेश जिसी र शिवबहादुर गुरुङविरुद्ध पनि पक्राउ पुर्जी जारी गरेको छ ।
न्यायाधीश श्यामप्रसाद श्रेष्ठको इजलासले पक्राउ गरेर अनुसन्धान गर्न अनुमति दिएसँगै उनीहरूविरुद्ध सुप्रिम सहकारी ठगीमा पनि मुद्दा अगाडि बढ्ने निश्चित भएको हो ।
पोखराको सूर्यदर्शन सहकारी ठगीमा छविलाल जोशी र रवि लामिछानेविरुद्ध पनि अनुसन्धान भइरहेको छ । जोशीको बुटवलमो पहिलो चरणको बयान गराइसकेको छ । लामिछानेलाई पनि बुटवल लैजाने तयारी छ ।
रवि र छविलाई सहकारीको रकम गैरकानुनी रूपमा गोर्खा मिडियामा लगेर अपचलन गरेको आरोप छ । अरु आरोपित भने बैंकिङ कारोबारमा हस्ताक्षर गर्नेहरू हुन् ।
वि.सं.२०८१ कात्तिक ९ शुक्रवार १२:३७ मा प्रकाशित
