हामी सबैकाे संसारन्यूज

महोत्तरी । महोत्तरीमा वडाध्यक्ष छोराको रहस्यमय मृत्युपछि शोकमा रहेकी आमालाई हृदयाघात भएको छ ।रामगोपालपुर नगरपालिका-२ का वडाध्यक्ष मुकेश यादवको मृत्युको शोकमा रहेकी आमा समुद्रीदेवी यादवको गएराति हृदयाघातको कारण मृत्यु भएको हो ।

३५ वर्षीय यादवको गएको भदौ ९ गते बिहान शंकास्पद अवस्थामा शव फेला परेको थियो । उनको हत्यामा संलग्न भएको आरोपमा दुईजना पक्राउ परेका छन् । उनीहरु पुर्पक्षको लागि हाल जलेश्वरस्थित जिल्ला कारागारमा थुनामाा छन् ।

मुकेशको मृत्युपछि रामगोपालपुर–२ मा आगामी मंसिर १६ गते उपनिर्वाचन हुँदैछ । माओवादी केन्द्रले मुकेशकी पत्नी आइतीकुमारी यादवलाई मंगलबार दिउँसो मात्रै उम्मेदवार घोषणा गरेको थियो । बुहारी उम्मेदवार घोषित भएकै राति सासुको हृदयघातबाट मृत्यु भएको हो ।

मंगलबार वरिष्ठ उपाध्यक्ष नारायणकाजी श्रेष्ठको प्रमुख आतिथ्यतामा आइतीकुमारीलाई वडाध्यक्षको उम्मेदवार बनाउने घोषणा गरेको थियो । गएको भदौ ९ गते बिहान महोत्तरीको बर्दिबास नगरपालिका-८ को सडक छेउमा मोटरसाइकलसँगै वडाध्यक्ष यादवको शव फेला परेको थियो ।

माओवादी केन्द्रले उनको हत्या भएको दाबी गर्दै प्रहरीलाई अनुसन्धानको लागि विभिन्न ढंगले दवाव दिँदै आएको थियो । घटनाको लामो अनुसन्धानपछि प्रहरीले महोत्तरीकै औरही नगरपालिका–७ बस्ने सञ्जीव झा र दिलिप मण्डल पक्राउ गरेर कारबाही प्रक्रिया अघि बढाएको छ ।