हामी सबैकाे संसारन्यूज

काठमाडौँ । झाँक्री प्रकाश भुजेलले चलाएको कारको ठक्करबाट घाइते भएका मोटरसाइकल चालकको मृत्यु भएको छ ।बुधवार दिउँसो सवा १ बजेतिर शंखरापुर नगरपालिका ९ स्थित साखु–थली सडक खण्डमा उनले चलाएको कारको ठक्करबाट मोटरसाइकलमा सवार २ जना गम्भीर घाइते भएका थिए ।

कारको ठक्करबाट काठमाडौँ कागेश्वरी मनोहरा नगरपालिका २ आलापोटका अन्दाजी ३८ वर्षीय नारायण नगरकोटीको मृत्यु भएको काठमाडौँ प्रहरी परिसरले जनाएको छ ।

मोटरसाइकलको पछाडि बसेकी उनकी श्रीमती अन्दाजी ३२ वर्षीय किसानुमाया नगरकोटी गम्भीर घाइते छिन् । थलिबाट साँखुतर्फ आउँदै गरेको प्रकाश भुजेलले चलाएको बा १९ च २६९५नम्बरको कारले सोही दिशातर्फ आउँदै बा प्र ०२–०१८ प ६८७५ नं को मोटरसाइकललाई ठक्कर दिएको थियो ।

घाइतेहरूलाई तत्काल नारायणटार स्थित शंखरापुर अस्पताल लगिएको थियो । त्यहाँबाट थप उपचारका लागि दुवै जनालाई ग्रान्डी अस्पताल पुर्याइएकोे थियो ।

दुर्घटनापछि झाँक्री भुजेल घटनास्थलमै कार छाडेर फरार थिए । उनलाई पक्राउ गरिसकेको काठमाडौँ प्रहरी प्रवक्ता एसपी नवराज अधिकारीले बताए । उनलाई प्रहरी वृत्त बौद्धको हिरासतमा राखेर अनुसन्धान गरिरहेको छ ।