हामी सबैकाे संसारन्यूज

१४ जेठ, काठमाडौँ  । ‘रोटरी इन्टरनेसनल डिस्ट्रिक्ट–३२९२’ ले आज विभिन्न विधाका छ पत्रकारलाई ‘रोटरी जोर्नाे अवार्ड–२०१७’ प्रदान गरेको छ ।

पुरस्कृत पत्रकारहरुमा रोश्ना सुब्बा (शिक्षा), पदमराज जोशी (स्वास्थ्य), सरोज कोइराला (वातावरण), सुजित महत (आर्थिक), प्रतिमा सिलवाल (महिला) र भूषण यादव (मूलधार माध्यम) हुनुहुन्छ ।

पुरस्कारको राशि जनही रु २५ हजार छ । रोटरी नेपालका डिस्ट्रिक्ट गभर्नर राज्यलक्ष्मी शाह र नेपाल पत्रकार महासङ्घका अध्यक्ष डा महेन्द्र विष्टले सो पुरस्कार हस्तान्तरण गर्नुभयो । विगत छ वर्षदेखि हरेक वर्ष यो पुरस्कार दिइँदै आएको छ ।

अध्यक्ष विष्टले पत्रकारितामा कार्यरतलाई प्रोत्साहन गर्ने रोटरीको सो कार्य सराहनीय भएको भन्दै निरन्तरताको कामना गर्नुभयो । गभर्नर शाहले सामाजिक भावनाबाट आफूहरुले समुदायमा एक दशकअघिदेखि सहयोग गर्दै आएको उल्लेख गर्नुभयो ।

नेपाल प्रेस इन्टिच्युटका अध्यक्ष तीर्थ कोइरालाले रोटरीले गरेका सामाजिक कामबारे बेलाबेलामा पत्रकारिताले पनि आँखा लगाएर उचित स्थान दिनुपर्ने बताउनुभयो ।

पत्रकारिताका विज्ञ र नेपाल पत्रकार महासङ्घका अध्यक्ष एवम् अन्य सञ्चार संस्थाका प्रतिनिधि सम्मिलित छनोट समितिको बैठकले उहाँहरुलाई सो पुरस्कार प्रदान गर्ने निर्णय गरेको हो ।

विभिन्न विधागत पत्रकारिताका संस्था, शिक्षा पत्रकार समूह, नेपाल स्वास्थ्य पत्रकार समूह, नेपाल वातावरण पत्रकार समूह, नेपाल आर्थिक पत्रकार समाज र सञ्चारिका समूहले प्रत्येक विधाका लागि सिफारिस गरेका तीन÷तीन पत्रकारमध्येबाट उहाँहरु छानिनुभएको रोटरीका जनसम्पर्क समितिका संयोजक महेश्वरभक्त श्रेष्ठले जानकारी दिनुभयो । रासस