हामी सबैकाे संसारन्यूज

स्याङ्जा । स्याङ्जाको फेदीखोला गाउँपालिकाका अध्यक्ष घनश्याम सुवेदीले आफ्ना छोराछोरीलाई सामुदायिक विद्यालयमा भर्ना गरेर सबैका लागि उदाहरणीय बनेका छन् ।

उनले आफ्नो छोरी स्वेच्छालाई फेदीखोला गाउँपालिका २ स्थित सिद्धार्थ माध्यमिक विद्यालय कक्षा ११ को विज्ञान संकायमा भर्ना गरेका हुन् ।
अध्यक्ष सुवेदीले छोरीको भर्ना पश्चात फेसबुकमा एक स्टाटस राख्दै लेखेका छन्, ‘आज मेरी छोरी स्वेच्छा सुवेदीलाई फेदीखोला गाउँपालिका–२ स्थित सिद्धार्थ माध्यमिक विद्यालयमा कक्षा ११ को विज्ञान संकायमा भर्ना गरे । स्वेच्छाले यही विद्यालयबाट एसईईमा उत्कृष्ट प्रदर्शन गर्दै नयाँ कक्षा प्रवेश गरेकी हुन् ।’

सुवेदीले आफू गाउँपालिकाको नेतृत्वमा निर्वाचित भएदेखि सार्वजनिक विद्यालयलाई गुणस्तरीय र विश्वासिलो बनाउने प्रतिबद्धता जनाएको बताए । उनले आफ्नो प्रतिबद्धता शब्दमा मात्र नभएर व्यवहारमै उतार्न आफ्नोे छोरा र छोरीलाई सामुदायिक विद्यालयमा अध्ययन गराउँदै आएको बताए ।

‘शिक्षा सबैको अधिकार हो । जब नेतृत्वले आफैंबाट उदाहरण देखाउँछ । तब मात्र जनविश्वास निर्माण हुन्छ । हामी सबै मिलेर सामुदायिक विद्यालयको स्तरवृद्धि गर्न सक्दछौँ ।सार्वजनिक शिक्षा सशक्त बनोस् ।’ उनले फेसबुकमा लेखेका छन् ।