हामी सबैकाे संसारन्यूज

दमौली । म्याग्दे गाउँपालिका–४ छिम्लेश्वारामा सोमबार सयपत्री फूल बिक्री भएपछि हाम्रो साथीहरू खुशी भए।

उनीहरूले चण्डेश्वरी फलफूल तथा तरकारी समूहको नाममा फूल पोखराको व्यापारीलाई प्रतिकिलो रु तीन सयमा बेचे। महेन्द्रराज रानाले भने, “हामीले दुई ठाउँमा गरी छ रोपनी जमिनमा पहिलो वर्ष फूल लगाएका थियौँ। एक ठाउँबाट १६८ र अर्को ठाउँबाट ३६८ किलो फूल बिक्री भयो।”

पहिलो वर्षमा नै फूल बिक्री भएपछि उनीहरू धेरै खुशी भएका रहेछन्। उनले भने, “फूलको माग अझै धेरै छ तर हामीसँग सकिसकेको छ। सबै फूल बिक्री हुँदा हाम्रो चिन्ता हट्यो।”

समूहकी अध्यक्ष जितमाया रानाले भने, “पहिले बजार नपाएर फूल लगाउँदा चिन्ता लाग्थ्यो, तर अहिले बजार पाउँदा मन प्रफुल्लित भयो। आगामी वर्ष फूल लगाउने जमिन अझ बढाउने योजना बनाएको छ।”

उनका अनुसार छ रोपनी जमिनमा भाडामा लिएर छ हजारभन्दा बढी बेर्ना रोपिएको थियो। यसअघि उनीहरूले काक्रा, घिरौला, बोडी, मास, करेला, खुर्सानीखेती गर्थे भने यस वर्ष नयाँ रूपमा सयपत्री फूलखेती सुरु गरेका छन्।