Sansar News
ओम आचार्य,अर्घाखाँची
उन्मुक्त हाँसो हरमा सजाई
छर्केर वास्ना जग मग्मगाई
खुलेर पूरा खलपत्र आई
खेलेर हावा सँगमा रमाई ।१।
हाँसो बनाई तनमा चढाई
माली बनाई मनले पढाई
नकाव च्यातेर गमी रमायी
सौन्दर्य पस्केर बहार ल्यायी ।२।
आँधी र अश्मन् सब मार झेली
रक्षा गरेको वय हो गुलाबी
प्रकाश भित्रै नव रङ्ग पेली
मुस्कान पोत्ने मनकी सहेली ।३।
उत्रेर हेरी रविको बिहानी
चिम्लेर आँखा खुश भो जवानी
पिएछ प्रेमी सकिएछ रात
संगीत मीठो नृत्यमा छ पात ।४।
बाँडेर शोभा धरती रँगाई
गाँसेर नाता पिरती बसायी
अनेक प्रेमी मनमा सजायी
राखेर आस्था समता जनायी ।५।
छन्द – उपजाति
वि.सं.२०८२ मंसिर २७ शनिवार ०५:५० मा प्रकाशित
