Sansar News
देवचुली । देवचुली नगरपालिकाको चालु आर्थिक वर्ष २०८२/०८३ को बजेट तथा कार्यक्रम संशोधनसहितको हिउँदे अधिवेशन सम्पन्न भएको छ । नगरसभाले नगर प्रमुख हरिप्रसाद न्यौपानेले प्रस्तुत गरेकाे विभिन्न प्रस्तावहरू सर्वसम्मत रूपमा पारित गरेको छ ।
शुक्रबार सम्पन्न नगरसभामा प्रस्तुत बजेट तथा कार्यक्रम संशोधन प्रस्तावहरूमाथि छलफलपछि नगर प्रमुख न्यौपानेले प्रस्तावको पक्ष र विपक्षमा मत राख्न आह्वान गरेका थिए । सो क्रममा नगरसभा सदस्यहरूले ‘हुन्छ’ भन्ने मत राखेसँगै सबै प्रस्तावहरू सर्वसम्मत रूपमा पारित भएको नगर प्रमुख न्यौपानेले सभालाई जानकारी गराए ।
नगर उपप्रमुख पार्वता तिवारीले सभामा चालु आर्थिक वर्ष २०८२/०८३ को बजेट तथा कार्यक्रम संशोधन प्रस्ताव प्रस्तुत गरेका थिए । साथै उनले हालसम्मको वित्तीय प्रगति समीक्षा गर्दै नगरपालिकाका विभिन्न शाखाबाट भएका ४० बुँदे प्रगति विवरण पनि प्रस्तुत गरे ।
नगरसभाको छलफलका क्रममा नगरसभा सदस्यहरूले विभिन्न कार्यक्रम तथा बजेटका विषयमा जिज्ञासा व्यक्त गरेका थिए । उठेका सवालहरूबारे नगर प्रमुख हरिप्रसाद न्यौपाने, नगर उपप्रमुख पार्वता तिवारी तथा प्रमुख प्रशासकीय अधिकृत अशोक कोइरालाले प्रष्ट पारेका थिए ।
देवचुली नगरपालिकाका नगर प्रमुख हरिप्रसाद न्यौपानेको अध्यक्षतामा सम्पन्न उक्त नगरसभाको सहजीकरण प्रमुख प्रशासकीय अधिकृत अशोक कोइरालाले गरेका थिए ।
वि.सं.२०८२ पुस १९ शनिवार १७:१० मा प्रकाशित
