हामी सबैकाे संसारन्यूज

काठमाडौं  । नेपाल लाइफ इन्स्योरेन्स कम्पनी लिमिटेडको प्रवर्द्धन तथा नेपाल लाइफ क्यापिटल लिमिटेडको योजना व्यवस्थापनमा सञ्चालन हुने ‘नेपाल लाइफ समृद्धि लगानी योजना’ नामक सामूहिक लगानी कोषको बिक्री खुला गरिएको छ।

उक्त योजना अन्तर्गत २०८२ साल माघ २ गतेदेखि फागुन १६ गतेसम्म इकाइहरू बिक्रीमा रहनेछन्। योजना बन्दोबस्त मिति २०८२ वैशाख ७ गते तोकिएको छ। प्रति इकाइ १० रुपैयाँ अंकित दरमा कुल १ अर्ब ६० करोड रुपैयाँ बराबरको १६ करोड इकाइ निष्कासन गरिएको छ।

निष्कासित कुल इकाइमध्ये १५ प्रतिशत अर्थात् २ करोड ४० लाख इकाइ कोष प्रवर्द्धक नेपाल लाइफ इन्स्योरेन्स कम्पनी लिमिटेडका लागि सुरक्षित गरिएको छ भने १ प्रतिशत अर्थात् १६ लाख इकाइ योजना व्यवस्थापक नेपाल लाइफ क्यापिटल लिमिटेडका लागि छुट्याइएको छ। बाँकी १४ करोड ४४ लाख इकाइ सर्वसाधारणका लागि खुला गरिएको छ।

लगानीकर्ताले न्यूनतम १०० इकाइदेखि अधिकतम १ करोड ६० लाख इकाइसम्म आवेदन दिन सक्ने व्यवस्था गरिएको छ। नेपाल लाइफ म्युचुअल फण्ड अन्तर्गतको यो पहिलो बन्दमुखी योजना हो, जसको अवधि १० वर्ष रहनेछ।

इकाइ खरीदका लागि नेपाल धितोपत्र बोर्डबाट अनुमति प्राप्त बैंक तथा वित्तीय संस्था र तिनका शाखा कार्यालयहरूबाट आवेदन दिन सकिनेछ। साथै, सिडिएस एन्ड क्लियरिङ लिमिटेडद्वारा विकसित ‘मेरो शेयर’ अनलाइन प्रणालीमार्फत पनि आवेदन दिन सकिने व्यवस्था गरिएको छ।

योजना निष्कासनका लागि इक्रा नेपाल लिमिटेडले कोष प्रवर्द्धकलाई [ICRANP-IR] AA- तथा योजना व्यवस्थापकलाई [ICRANP] AMC Quality 3 (AMC3) रेटिङ प्रदान गरेको छ, जसले वित्तीय दायित्व समयमै पूरा गर्ने क्षमतामा उच्च सुरक्षाको संकेत गर्दछ।