हामी सबैकाे संसारन्यूज

काठमाडौं । नेपालको अग्रणी जीवन बीमा कम्पनी नेपाल लाइफ इन्स्योरेन्स कम्पनी लिमिटेड ‘The HRM Awards for Corporate Excellence 2025’ बाट सम्मानित भएको छ । कर्पोरेट क्लब नेपालद्वारा आयोजना गरिएको उक्त कार्यक्रममा कम्पनीले लाइफ इन्स्योरेन्स विधातर्फ उत्कृष्ट प्रदर्शन गरेबापत अवार्ड प्राप्त गरेको हो ।

अवार्ड समारोह काठमाडौंमा सम्पन्न भएको थियो । सो अवसरमा नेपाल लाइफ इन्स्योरेन्सका प्रमुख कार्यकारी अधिकृत (CEO) प्रविण रमण पराजुली तथा नायब प्रमुख कार्यकारी अधिकृत अमित कुमार कायस्थले अवार्ड ग्रहण गरेका थिए ।

कम्पनीले वित्तीय सुदृढता, सुशासन, दाबी भुक्तानीको प्रभावकारिता, ग्राहक सेवा, मानव संसाधन व्यवस्थापन, डिजिटलाइजेशन, अटोमेसन तथा डिजिटल ट्रान्सफर्मेसनका क्षेत्रमा गरेको उल्लेखनीय योगदानका आधारमा यो सम्मान प्राप्त गरेको आयोजकले जनाएको छ ।

नेपाल लाइफ इन्स्योरेन्सले पारदर्शी नीति तथा योजना, प्रभावकारी कार्यसम्पादन, जोखिम व्यवस्थापन, नवप्रवर्तन तथा सामाजिक उत्तरदायित्व अन्तर्गतका कार्यक्रममार्फत बीमा क्षेत्रमा उल्लेखनीय भूमिका खेल्दै आएको छ । कम्पनीले आम सर्वसाधारणलाई सरल, सहज र विश्वासिलो बीमा सेवा प्रदान गर्दै आएको बताइएको छ ।

अवार्ड प्राप्तिप्रति खुशी व्यक्त गर्दै कम्पनीका प्रमुख कार्यकारी अधिकृत प्रविण रमण पराजुलीले यस सफलतामा सञ्चालक समिति, कर्मचारी, बीमित, अभिकर्ता, नियामक निकाय, शेयरधनी तथा सम्पूर्ण सरोकारवालाको योगदान रहेको बताए । उनले आगामी दिनमा पनि जीवन बीमाको महत्व र पहुँच विस्तार गर्दै अझ प्रभावकारी र ग्राहककेन्द्रित सेवा प्रदान गर्ने प्रतिबद्धता व्यक्त गरे ।