हामी सबैकाे संसारन्यूज

काठमाडौँ । दोलखा जिल्लाको तामाकोशी गाउँपालिका–४ अन्तर्गत पर्ने मालु मतदान केन्द्रमा उत्पन्न विवादपछि मतदान प्रक्रिया अझै सुरु हुन सकेको छैन ।

मतदानका क्रममा कर्मचारीमाथि हातपात गर्ने प्रयास भएपछि स्थिति नियन्त्रणमा लिन प्रहरीले हवाई फायर गरेको थियो। घटनापछि मतदान स्थगित गरिएको हो।

सहायक प्रमुख जिल्ला अधिकारी औलाख बहादुर आलेका अनुसार मतपत्र लुटपाटको प्रयास भएपछि दलका प्रतिनिधि (बुथ एजेन्ट)हरूलाई सुरक्षित स्थानमा राखिएको छ ।

‘बुथ एजेन्टहरूलाई सुरक्षित ठाउँमा राखिएको छ । मतपत्र लुटपाट हुन थालेपछि उहाँहरूलाई सुरक्षाका लागि बाहिर लगिएको हो,’ उनले बताए ।

बुथमा रहेका केही दलका प्रतिनिधिले नै मतपत्र लुट्न खोजेपछि अवस्था तनावग्रस्त बनेको प्रशासनले जनाएको छ। ‘नियन्त्रणमा लिएको होइन, सुरक्षित स्थानमा राखेका हौँ। केही प्रतिनिधिले मतपत्र लुट्न खोजेपछि समस्या भएको हो,’ आलेले स्पष्ट पारे।

हाल मतदान केन्द्रमा सर्वपक्षीय छलफल जारी रहेको र अवस्था सामान्य बनाएपछि मात्र मतदान पुनः सञ्चालन गरिने जनाइएको छ । सुरक्षा व्यवस्था कडा पारिएको प्रशासनले जानकारी दिएको छ ।