हामी सबैकाे संसारन्यूज

काठमाडौं । एन आई सी एशिया बैंकले आफ्नो संस्थागत सामाजिक उत्तरदायित्व (CSR) अन्तर्गत काठमाडौंको तिलगंगास्थित शान्ति सेवा गृहमा रहेका १५० भन्दा बढी विद्यार्थीलाई शैक्षिक सामग्री प्रदान गरेको छ।

विद्यार्थीहरूको शैक्षिक गुणस्तर अभिवृद्धि तथा पठनपाठनमा सहयोग पुर्‍याउने उद्देश्यले बैंकले झोला तथा अन्य आवश्यक शैक्षिक सामग्री सहयोग गरेको हो। उक्त सामग्री बैंकका प्रमुख कार्यकारी अधिकृत सुजित कुमार शाक्य र नायव प्रमुख कार्यकारी अधिकृत सन्तोष कुमार राठीले शान्ति सेवा गृहकी प्रबन्ध निर्देशक अप्सरा कार्कीलाई फाल्गुण २८ गते आयोजित एक कार्यक्रमका बीच हस्तान्तरण गरेका हुन्।

लामो समयदेखि परोपकारी संस्थाका रूपमा कार्यरत शान्ति सेवा गृहमा आश्रित बालबालिकाहरूलाई प्रदान गरिएको यस सहयोगले उनीहरूको अध्ययनलाई निरन्तरता दिन र शैक्षिक गुणस्तर सुधार गर्न सहयोग पुग्ने बैंकले विश्वास लिएको छ।

यसै वर्ष बैंकले सातै प्रदेशका विभिन्न सरकारी तथा सामुदायिक विद्यालयमा कक्षा ६ देखि कक्षा १० सम्म अध्ययनरत गरिब, जेहेन्दार, विपन्न तथा पिछडिएका वर्गका साथै शारीरिक रूपमा विशेष क्षमता भएका विद्यार्थीलाई छात्रवृत्ति प्रदान गरेको जनाएको छ।

यसअघि पनि बैंकले सरकारी तथा सामुदायिक विद्यालयमा अध्ययनरत जेहेन्दार विद्यार्थीलाई छात्रवृत्ति प्रदान गर्नुका साथै सातै प्रदेशका विभिन्न विद्यालयमा पुस्तकालय भवन निर्माण गरी पुस्तकालय स्थापना गर्ने कार्य गरिसकेको छ।