हामी सबैकाे संसारन्यूज

काठमाडौँ । Nepal Telecom ले डेनमार्क र दक्षिण कोरियामा अन्तर्राष्ट्रिय भोल्टे (भ्वाइस ओभर एलटिई) रोमिङ सेवा सञ्चालनमा ल्याएको छ। अब नेपाल टेलिकमका ग्राहकहरूले यी दुई देशमा समेत अन्तर्राष्ट्रिय भ्वाइस रोमिङ सेवा प्रयोग गर्न सक्ने भएका छन्।

यसअघि अमेरिका, अष्ट्रेलिया, लक्जेम्बर्ग, इजरायल र ताइवान–आरओसीमा उपलब्ध रहेको उक्त सेवा विस्तार गर्दै थप दुई देशमा सञ्चालनमा ल्याइएको हो। सेवा सुरु भएसँगै ग्राहकहरूले विदेशमा पनि उच्च गुणस्तरको भ्वाइस कल सुविधा उपयोग गर्न सक्नेछन्।

भोल्टे (भ्वाइस ओभर एलटिई) सेवा नेपाल टेलिकमले राष्ट्रिय स्तरमै पहिलेदेखि उपलब्ध गराउँदै आएको प्रविधि हो, जसले उच्च गुणस्तरको आवाजसहित छिटो कल जडान हुने सुविधा प्रदान गर्छ। मोबाइलमा यो सेवा सक्रिय भएको अवस्थामा मात्र यो सुविधा प्रयोग गर्न सकिन्छ।

ग्राहकहरूले आफ्नो मोबाइलमा भोल्टे सेवा समर्थित भए/नभएको जाँच गर्न सक्नेछन्। यदि सेवा सक्रिय नभएको खण्डमा *४४४# डायल गरी ‘भोल्टे सक्रिय गर्नुहोस्’ विकल्पमार्फत सेवा सञ्चालन गर्न सकिने जनाइएको छ।

नेपाल टेलिकमका अनुसार, अन्तर्राष्ट्रिय भोल्टे रोमिङ सेवाको विस्तारले विदेशमा रहेका नेपालीहरूलाई अझ सहज र गुणस्तरीय सञ्चार सेवा उपलब्ध गराउने विश्वास लिइएको छ।