हामी सबैकाे संसारन्यूज

काठमाडौँ । Lumbini Bikas Bank Ltd. ले “ग्लोबल मनि विक २०२६” को अवसरमा विभिन्न विद्यालयमा वित्तीय साक्षरता कार्यक्रम सञ्चालन गरेको छ। सातै प्रदेशमा रहेका आफ्ना शाखा कार्यालयमार्फत आयोजना गरिएको उक्त कार्यक्रममा करिब ६ हजार विद्यार्थी लाभान्वित भएका छन्।

कार्यक्रम अन्तर्गत बैंकले विद्यालयहरूमा पुगेर बचत, निक्षेप, कर्जा लगानी, विप्रेषण तथा डिजिटल बैंकिङ लगायतका विषयमा वित्तीय साक्षरता कक्षा सञ्चालन गरेको थियो। यसले विद्यार्थीहरूमा वित्तीय ज्ञानको विकासमा टेवा पुगेको बैंकले जनाएको छ।

उक्त अवसरमा बैंकका शाखा कार्यालयहरूले वित्तीय जानकारीमूलक झाँकी प्रदर्शनसमेत गरेका थिए। “स्मार्ट मनि टक्स” भन्ने नाराका साथ सञ्चालन गरिएको यो कार्यक्रम “ग्लोबल मनि विक” अन्तर्गत मार्च १७ देखि २३ सम्म मनाइएको थियो।

बैंकका अनुसार, वित्तीय साक्षरतामार्फत बैंकिङ प्रणालीप्रति सर्वसाधारणलाई सचेत बनाउँदै विशेषगरी युवा तथा विद्यार्थीमा वित्तीय ज्ञानको विकास गराउने लक्ष्य राखिएको छ।

हाल Lumbini Bikas Bank Ltd. ले देशभर ७ वटै प्रदेशमा शाखा सञ्जाल विस्तार गर्दै आधुनिक बैंकिङ सेवा प्रदान गर्दै आएको छ। साथै ग्राहकलाई सहज र सुरक्षित सेवा उपलब्ध गराउने उद्देश्यले विभिन्न नवीन प्रविधिमा आधारित सेवाहरू सञ्चालनमा ल्याइएको बैंकले जनाएको छ।