हामी सबैकाे संसारन्यूज

काठमाडौं । ज्योति विकास बैंक ले Global Money Week 2026 अभियान अन्तर्गत वित्तीय साक्षरतासम्बन्धी विभिन्न कार्यक्रम सफलतापूर्वक सम्पन्न गरेको छ ।

बैंकले चैत १० गतेदेखि १८ गतेसम्म (मार्च २३–३०, २०२६) सञ्चालन गरिएको उक्त अभियानका क्रममा देशभर विविध वित्तीय साक्षरता कार्यक्रम आयोजना गरेको जनाएको छ । यस वर्ष “Smart Money Talks” नारासहित सञ्चालन गरिएको अभियानले विशेषगरी युवा तथा विद्यार्थी वर्गलाई लक्षित गर्दै वित्तीय ज्ञान अभिवृद्धि गर्ने उद्देश्य राखेको थियो ।

अभियानअन्तर्गत बैंकले डिजिटल माध्यममार्फत समेत वित्तीय शिक्षा प्रवाह गर्दै सर्वसाधारणलाई आधुनिक बैंकिङ सेवा, बचत, लगानी, कर्जा, डिजिटल भुक्तानी प्रणाली, OTP सुरक्षा, साइबर जोखिम तथा वित्तीय अनुशासनका विषयमा जानकारी प्रदान गरेको थियो । साथै, विभिन्न शाखा कार्यालयमार्फत विद्यालय तथा कलेजस्तरमा सचेतनामूलक कार्यक्रम सञ्चालन गरिएको बैंकले जनाएको छ ।

त्यसैगरी, बैंकका प्राविधिक तथा क्लस्टर कार्यालयहरूको समन्वयमा देशभर रहेका शाखाहरूबाट वित्तीय साक्षरता अभिवृद्धिका लागि अन्तरक्रियात्मक कार्यक्रम, प्रशिक्षण तथा जनचेतनामूलक गतिविधि सञ्चालन गरिएका थिए । बैंकले अडियो–भिजुअल सामग्रीमार्फत पनि वित्तीय शिक्षा विस्तार गर्दै सर्वसाधारणलाई सही वित्तीय निर्णय लिन प्रेरित गरेको छ ।

बैंकका अनुसार, यस अभियानबाट करिब २,००० भन्दा बढी व्यक्ति प्रत्यक्ष रूपमा लाभान्वित भएका छन् । वित्तीय साक्षरता अभिवृद्धिले व्यक्तिलाई आर्थिक रूपमा सक्षम बनाउनुका साथै समग्र अर्थतन्त्रको सुदृढीकरणमा समेत टेवा पुग्ने विश्वास बैंकले व्यक्त गरेको छ ।

सामाजिक उत्तरदायित्वलाई प्राथमिकतामा राख्दै ज्योति विकास बैंक ले आगामी दिनमा पनि यस्ता कार्यक्रमहरूलाई निरन्तरता दिने प्रतिबद्धता जनाएको छ । बैंकले देशभर ११५ शाखा, ३ एक्सटेन्सन काउन्टर तथा ७५ एटीएममार्फत सेवा प्रदान गर्दै आएको छ ।