हामी सबैकाे संसारन्यूज

काठमाडौँ । एन आई सी एशिया बैंक लिमिटेड ले नयाँ वर्ष विक्रम संवत् २०८३ को अवसरमा नेपाली लोक बाजाको संरक्षण तथा प्रवर्द्धन गर्ने उद्देश्यसहित नयाँ क्यालेन्डर सार्वजनिक गरेको छ।

बैंकले परम्परागत तथा लोपोन्मुख नेपाली लोक बाजामार्फत नेपालको सांस्कृतिक इतिहास र पहिचान झल्काउने गरी आकर्षक डिजाइनमा क्यालेन्डर तयार पारेको जनाएको छ। यस कार्यमा नेपाली लोक बाजा संग्रहालय को सहयोग रहेको बैंकले जानकारी दिएको छ।

क्यालेन्डरमा देशका विभिन्न क्षेत्र, समुदाय तथा चाडपर्वमा प्रयोग हुने धार्मिक, सांस्कृतिक, सामाजिक तथा ऐतिहासिक महत्व बोकेका बाजाहरू र तिनको बजाउने शैलीसमेत समेटिएको छ। भित्ते तथा टेबल दुवै प्रकारका क्यालेन्डर बैंकको आधिकारिक वेबसाइटमार्फत उपलब्ध गराइएको छ।

बैंकका अनुसार नेपाली लोक बाजाहरू हाम्रो संस्कृति, परम्परा र पहिचानका महत्वपूर्ण प्रतीक हुनुका साथै अमूल्य सांस्कृतिक सम्पदा पनि हुन्। यस पहलले ती बाजाहरूको संरक्षण, प्रवर्द्धन तथा पुस्तान्तरणमा टेवा पुग्ने विश्वास गरिएको छ।

साथै, क्यालेन्डरमा नेपाल सरकारद्वारा प्रकाशित राजपत्रमा उल्लेख भएका सार्वजनिक बिदा, चाडपर्व, दिवस तथा पञ्चाङ्गसम्बन्धी विवरणहरू पनि समावेश गरिएको छ। इच्छुक व्यक्तिहरूले बैंकको वेबसाइटमार्फत क्यालेन्डर डाउनलोड गर्न सक्ने व्यवस्था गरिएको बैंकले जनाएको छ।

बैंकका सहायक प्रमुख कार्यकारी अधिकृत तथा प्रमुख सूचना अधिकारी जयन्द्र रावलले नयाँ वर्ष २०८३ ले सम्पूर्ण ग्राहक तथा सरोकारवालाहरूमा नयाँ आशा, भरोसा र उत्साह ल्याउने विश्वास व्यक्त गरेका छन्।