हामी सबैकाे संसारन्यूज

काठमाडौँ । आम निर्वाचन २०८२ पछि विकसित राजनीतिक परिस्थितिका बीच जनता समाजवादी पार्टी (जसपा) नेपालका महासचिव राम कुमार शर्माले आफ्नो पदबाट राजीनामा दिएका छन्।

उनले सार्वजनिक वक्तव्यमार्फत निर्वाचन परिणामलाई स्वीकार गर्दै नैतिकताको आधारमा राजीनामा दिएको बताएका छन्। वक्तव्यमा उनले आम निर्वाचन २०८२ लाई नेपालको राजनीतिक इतिहासमा धेरै नयाँ रेकर्ड कायम गर्ने ऐतिहासिक निर्वाचनका रूपमा उल्लेख गरेका छन्।

यस निर्वाचनमा बालेन्द्र साह नेतृत्वमा अभूतपूर्व सफलता हासिल भएको, करिब ४८ प्रतिशत मतसहित ठूलो जनसमर्थन प्राप्त भएको तथा परम्परागत राजनीतिक संरचनाभन्दा बाहिरबाट नेतृत्व उदाएको उल्लेख गरिएको छ। उनले मेयरदेखि प्रधानमन्त्रीसम्मको यात्रा “असाधारण” भएको बताएका छन्।

निर्वाचन परिणामबारे विभिन्न तहमा बहस भइरहेका उल्लेख गर्दै उनले केही पक्षहरूले यसलाई अस्वाभाविक र रणनीतिक प्रभावको परिणाम भने पनि धेरैले यसलाई विगतका सरकारहरूको कुशासन, भ्रष्टाचार र असफल नीतिहरूको स्वाभाविक प्रतिक्रिया मानेको बताएका छन्।

शर्माले विशेषगरी मधेस आन्दोलनको बलमा स्थापित जसपा नेपालको शून्य सिटमा झर्नु सामान्य हार नभई सामूहिक कमजोरीको परिणाम भएको स्वीकार गरेका छन्। उनले यसलाई आत्मसमिक्षाको विषय बनाउँदै पार्टीको जिम्मेवारीबाट अलग हुने निर्णय लिएको स्पष्ट पारेका छन्।

अन्त्यमा उनले पार्टीका अध्यक्ष उपेन्द्र यादव प्रति कृतज्ञता व्यक्त गर्दै आफूलाई दिइएको जिम्मेवारीका लागि धन्यवाद दिएका छन्।