हामी सबैकाे संसारन्यूज

काठमाडौं । स्मार्ट च्वाइस टेक्नोलोजिज (SCT) र सिटी टेक ग्रुप प्रा. लि. बीच डिजिटल भुक्तानी प्रणाली सुदृढ गर्ने उद्देश्यसहित रणनीतिक साझेदारी गरिएको छ। कम्पनीहरूले संयुक्त रूपमा जारी गरेको जानकारीअनुसार उक्त सहकार्यले नेपालमा भुक्तानी स्वीकार (payment acceptance) प्रणालीलाई थप आधुनिक र प्रभावकारी बनाउने अपेक्षा गरिएको छ।

साझेदारीपछि सिटी टेकद्वारा विकसित FinPOS डिभाइसमा SCT को प्लेटफर्म एकीकृत हुने भएको छ। यसमार्फत Visa, UnionPay, NepalPay लगायत विभिन्न कार्ड स्किमका साथै Smart QR प्रयोग गरी डिजिटल भुक्तानी स्वीकार गर्न सकिने व्यवस्था गरिनेछ।

कम्पनीहरूका अनुसार यस सहकार्यले SCT को सशक्त भुक्तानी पूर्वाधारलाई सिटी टेकको नवीन प्रविधिसँग जोड्दै बैंक तथा व्यापारीहरूका लागि सहज, सुरक्षित र विस्तारयोग्य POS समाधान उपलब्ध गराउनेछ।

POS acquiring व्यवसाय सञ्चालन गर्न चाहने बैंक, वित्तीय संस्था तथा भुक्तानी सेवा प्रदायकहरूका लागि यो सेवा विशेष लाभदायी हुने जनाइएको छ। छुट्टाछुट्टै कार्ड स्किमको सदस्यता लिनु नपर्ने, प्रविधिमा ठूलो लगानी गर्न नपर्ने तथा सुरक्षा प्रमाणीकरण प्रक्रियामा सहजता आउने भएकाले यसले लागतसमेत घटाउने विश्वास गरिएको छ।

SCT ले डिजिटल भुक्तानी प्रणालीको पहुँच विस्तार र नवप्रवर्तनलाई प्राथमिकतामा राख्दै आएको जनाएको छ। FinPOS सँगको सहकार्यलाई कम्पनीले सोही प्रतिबद्धताको महत्वपूर्ण कदमका रूपमा व्याख्या गरेको छ।

हाल SCT ले २४ वटा बैंक तथा वित्तीय संस्था र १०० भन्दा बढी सहकारीमार्फत SCT-UnionPay कार्ड सेवा प्रदान गर्दै आएको छ। कम्पनीले आफ्नै ‘स्मार्ट स्विच’ प्रणालीमार्फत Visa लगायत विभिन्न अन्तर्राष्ट्रिय कार्ड स्वीकार गर्दै आएको छ भने Smart QR, अन्तरबैंक भुक्तानी (IBFT) र मोबाइल बैंकिङ सेवा पनि उपलब्ध गराउँदै आएको छ।

करिब दुई दशकदेखि सञ्चालनमा रहेको SCT नेपालकै पहिलो डोमेस्टिक कार्ड स्किमका रूपमा परिचित छ। यस नयाँ साझेदारीसँगै डिजिटल भुक्तानी सेवा अझ विस्तार हुने अपेक्षा गरिएको छ।