हामी सबैकाे संसारन्यूज

काठमाडौं । सानिमा बैंक ले आफ्ना क्रेडिट कार्ड प्रयोगकर्ताका लागि नयाँ र आकर्षक सुविधा सार्वजनिक गरेको छ। बैंकले फिनतारा सोलुसन्स प्रा.लि. सँग सहकार्य गर्दै ०% ब्याजमा किस्ताबन्दी (EMI) सेवा सुरु गरेको हो, जसले ग्राहकलाई महँगो सामान खरिद गर्न अझ सहज बनाउने अपेक्षा गरिएको छ।

यस सहकार्यअन्तर्गत, सानिमा बैंकका ग्राहकहरूले फिनतारासँग आबद्ध विभिन्न मर्चेन्ट स्टोरहरूमा क्रेडिट कार्ड प्रयोग गरी खरिद गर्दा अधिकतम १२ महिनासम्म बिना ब्याज किस्ताबन्दी सुविधा लिन सक्नेछन्। यो सुविधा विशेषगरी इलेक्ट्रोनिक्स, मोबाइल, ल्यापटप, फर्निचर, माउन्टेन बाइक तथा विभिन्न घरेलु उपकरण खरिदमा लागू हुनेछ।

बैंकका अनुसार, यस पहलले उच्च मूल्यका सामग्रीलाई सर्वसुलभ बनाउँदै ग्राहकलाई एकैपटक ठूलो रकम तिर्नुपर्ने दबाबबाट मुक्त गर्नेछ। साथै, डिजिटल भुक्तानी प्रणालीलाई थप प्रवर्द्धन गर्ने लक्ष्य पनि राखिएको छ।

सानिमा बैंकले पछिल्लो समय आफ्ना ग्राहकहरूलाई आकर्षित गर्न विभिन्न छुट, अफर तथा डिजिटल सेवाहरू विस्तार गर्दै आएको छ। बैंकको दाबी अनुसार, यस्ता योजनाले नगदरहित कारोबारलाई प्रोत्साहन गर्नुका साथै आधुनिक बैंकिङ्ग अनुभव प्रदान गर्नेछ।

हाल सानिमा बैंक ले देशका सातै प्रदेशमा १३४ शाखा कार्यालय र १२७ एटीएम मार्फत सेवा प्रदान गर्दै आइरहेको छ।