हामी सबैकाे संसारन्यूज

काठमाडौं । पूर्वमन्त्री तथा संघीय संसद्  बब्लु गुप्ताले सामाजिक सञ्जालमा भाइरल भएको मोटरसाइकल सम्बन्धी भिडियोप्रति माफी मागेका छन्।

मोटरसाइकलको पछाडि उभिएर भिडियो बनाएको दृश्य सार्वजनिक भएपछि त्यसले ट्राफिक नियम उल्लङ्घन गरेको भन्दै आलोचना भएको थियो। त्यसपछि गुप्ताले सामाजिक सञ्जालमार्फत आफ्नो धारणा सार्वजनिक गर्दै उक्त कार्यप्रति क्षमायाचना गरेका हुन्।

उनले बाल्यकाल बिताएको ठाउँमा पुग्दा पुराना सम्झनाहरू ताजा भएको र त्यही उत्साह तथा रमाइलोका क्रममा मजाक–मजाकमै भिडियो बनाउँदा ट्राफिक नियम उल्लङ्घन भएको कुरा आफूले महसुस गरेको बताएका छन्।

गुप्ताले अब आफ्नो जोश र ऊर्जा देश तथा जनताको हितमा समर्पित गर्ने प्रतिबद्धता व्यक्त गर्दै आफूबाट जानी वा नजानी कुनै गल्ती भएको भए सबैसँग क्षमा मागेका छन्।

उनले लेखेका छन्, “अहिले सामाजिक सञ्जालमा म मोटरसाइकलमा बसेको एउटा भिडियो भाइरल भइरहेको छ। बाल्यकालमा खेलेको ठाउँमा पुग्दा पुराना सम्झनाहरू ताजा भए। त्यही खुसी र रमाइलोको क्षणमा मजाक–मजाकमै मोटरसाइकलको पछाडि उभिएर भिडियो बनाउँदा मैले ट्राफिक नियम उल्लङ्घन गरेको रहेछु भन्ने कुरा मैले आफैं महसुस गरेको छु। अब यही जोश र ऊर्जा देश र जनताको हितमा समर्पित गर्ने प्रतिबद्धता व्यक्त गर्दछु। मबाट जानी वा नजानी कुनै गल्ती भएको भए क्षमा माग्दछु।”