हामी सबैकाे संसारन्यूज

२३ मंसिर, काठमाडौं । काठमाडौं क्षेत्र नं १० बाट नेपाली कांग्रेसका उम्मेदवार रहेका राजन केसी प्रतिनिधिसभा सदस्यमा विजयी भएका छन् ।

काठमाडौंको अन्तराष्ट्रिय सम्मेलन केन्द्रमा भइरहेको मतगणनाको अन्तिम परिणाम अनुसार राजन केसीले २४ हजार १९० मत ल्याएर विजयी भएका हुन् । उनका प्रतिद्धन्द्धी वाम गठबन्धनका तर्फबाट उम्मेदवार बनेका नेकपा माओवादी केन्द्रका नेता हितमान शाक्यले २१ हजार ९०७ मत प्राप्त गरेका थिए ।

खेलकुदमन्त्री समेत रहेका केसीले विजयपछि मतदाता लगायत सबैमा आभार व्यक्त गरेका छन् । उनले भने ‘ २०७० सालको निर्वाचनमा यहाहरुले मलाइ दिनु भएको जिम्मेवारी मैले यहाहरुको अपेक्षा अनुसार सफलतापूर्बक नै पुरा गरे । मुलत ः हाम्रो काठमान्डौ जिल्लाभरिकै बिकासमा पछी परेको क्षेत्र भएकोले, बिकासलाइ अभियानको रुपमा लैजाने मेरो यहाँहरु संगको प्रतिबद्दतालाइ मैले तिब्रता साथ अघि बढाए । धेरै काम सम्पन्न भयो, धेरै काम सुरु भएका छन्, पूर्णता दिलाउनु पर्ने जिम्मेवारी अझै बाकि छ ।’

अहिले सम्म काठमाडौंको ७ ठाउँको मत परिणाम आइसकेको छ । जसमा १ ४ र १० मा नेपाली कांग्रेस र ३, ८ र ९ मा वाम गठबन्धन विजयी भएको छ ।